FastNews-ը շարունակում է Fastex Պրեմիեր լիգայի աշնանային հատվածում թիմերի ելույթների ամփոփումը: Այսօր կանդրադառնանք «Արարատին»:

1. «Արարատը» Տիգրան Եսայանի գլխավորությամբ Fastex Պրեմիեր լիգայի աշնանային հատվածի 17 հանդիպումներում վաստակած 15 միավորով (4 հաղթանակ, 3 ոչ-ոքի, 10 պարտություն, խփած և բաց թողած գոլեր՝ 16-31) զբաղեցնում է 9-րդ տեղը: Դա հնարավոր միավորների 29,4 տոկոսն է:

«Արարատի» ներկայիս արդյունքը 5 միավորով զիջում է նախորդ առաջնության մեկնարկային 17 հանդիպումներում թիմի գրանցած ցուցանիշը (6 հաղթանակ, 2 ոչ-ոքի, 9 պարտություն, խփած և բաց թողած գոլեր՝ 16-28): «Արարատն» ընթանում էր 6-րդ տեղում:

2. «Արարատը» սեփական դաշտում անցկացրած 9 հանդիպումներում վաստակեց 8 միավոր (2 հաղթանակ, 2 ոչ-ոքի, 5 պարտություն, խփած և բաց թողած գոլեր՝ 9-14), ինչը հնարավոր միավորների 29,6 տոկոսն է:

Սեփական դաշտում արարատցիները պարտվել են «Շիրակին» (1-2), «Վանին» (0-3), «Ուրարտուին» (0-1), «Փյունիկին» (0-2) և «Վեստ Արմենիային» (2-3):

Հյուրընկալվելիս անցկացրած 8 հանդիպումներում արարատցիները վաստակեցին 7 միավոր (2 հաղթանակ, 1 ոչ-ոքի, 5 պարտություն, խփած և բաց թողած գոլեր՝ 7-17), ինչը հնարավոր միավորների 29,1 տոկոսն է:

Մրցակցի դաշտում «Արարատը» հաղթել է «Գանձասարին» (2-0) և «Վեստ Արմենիային» (2-1): 

3. «Արարատն» առաջնությունում մեկնարկեց 2 անընդմեջ հաղթանակով, մեկնարկային 6 հանդիպումներում վաստակած 13 միավորով 4 առաջատարներից մեկն էր՝ կրելով ընդամենը մեկ պարտություն:

Հաջող մեկնարկին հետևեց 7 անընդմեջ պարտությունների և առանց հաղթանակի 11 խաղերի շարքը, 479 րոպե տևած գոլային երաշտը, ինչի արդյունքում արարատցիները նահանջեցին 9-րդ հորիզոնական:

17 հանդիպումներից 8-ում «Արարատը»  չկարողացավ գրավել մրցակիցների դարպասը: Միայն 3 խաղում թիմի դարպասն անառիկ մնաց:

«Արարատը» խոշոր հաշվով 4 պարտություն կրեց («Վան»՝ 0-3, 0-4, «Փյունիկ»՝ 0-3, «Նոա»՝ 0-4)`չտոնելով այդ կարգի ոչ մի հաղթանակ:

4. «Արարատի»  մասնակցությամբ հանդիպումներում նշանակվել է 11մ 9 հարված, որոնք բոլորն էլ իրացվել են: Թիմի օգտին նշանակված 11մ 4 հարվածներից 3-ը դիպուկ է իրացրել Մուսա Կանտեն՝ գրավելով շիրակցի Դարկո Վուկաշինովիչի, բանակային Արման Ներսեսյանի և «Արարատ-Արմենիայի» դարպասապահ Դանիլո Կուչերի պաշտպանած դարպասները:

Արմեն Նահապետյանն էլ հաղթող է դուրս եկել գանձասարցի Սերգեյ Դոցենկոյի հետ մենամարտում:

Տիագո Գոմեսի դարպասը 11մ հարվածով գրավել են շիրակցի Մորի Կոնեն, բանակային Արայիկ Էլոյանը, փյունիկցի Սերժ Դեբլեն, «Ուրարտուի» ռմբարկու Իվան Իգնատևը և «Արարատ-Արմենիայի» հարձակվող Մարիուս Նուբիսին:

5. «Արարատն» առաջնության աշնանային հատվածի 17 հանդիպումներում ընդամենը 16 գնդակ խփեց (միջինը մեկ խաղում՝ 0,94 գոլ): Արդյունավետությամբ արարատցիները գերազանցեցին միայն «Շիրակին», «Ալաշկերտին» և «Գանձասարին»:

Գոլերի հեղինակներ դարձան թիմի 6 ֆուտբոլիստներ, որոնցից Ռայան Մզուգին, Մուսա Կանտեն, Իլարիոն Գուռը բացեցին գոլերի հաշիվն «Արարատում»:

Առավել արդյունավետ գործեց 6 գոլ խփած Իլարիոն Գուռը: Նա ընդգրկվեց Fastex Պրեմիեր լիգայում «Արարատում» գոլ խփած ամենաերիտասարդ ֆուտբոլիստների տասնյակում՝ օգոստոսի 3-ին «Ալաշկերտի» դարպասը գրավելով 18 տարեկան 345 օրականում: Գուռը տասնյակից դուրս թողեց թիմի նախկին ֆուտբոլիստ Վարուժան Մկրտչյանին, որը գոլերի հաշիվը բացել էր 19 տարեկան 85 օրականում:

19-ամյա Իլարիոն Գուռը նաև կրկնեց թիմի նախկին ֆուտբոլիստ Դոնիմանի Յակուբա Սիլուեի արդյունավետության տարիքային ռեկորդը, որն այդ տարիքում լեգեոնականներից բոլորից շատ՝ 6 գոլ էր խփել:

6. Օգոստոսի 24-ին «Վեստ Արմենիայի» նկատմամբ տարած հաղթանակը հոբելյանական՝ 350-րդն էր «Արարատի» համար Fastex Պրեմիեր լիգայում: Իսկ դեկտեմբերի 3-ին «Վեստ Արմենիայի» դարպասն Իլարիոն Գուռի խփած երկրորդ գնդակը Fastex Պրեմիեր լիգայում թիմի հոբելյանական՝ 1350-րդ գոլն էր:

5 գոլի հեղինակ դարձած 20-ամյա Մուսա Կանտեն արդյունավետության տարիքային նոր ռեկորդ սահմանեց՝ գերազանցելով թիմի նախկին ֆուտբոլիստներ Վելսեն Ջունիորի և Ռանսոմ Իբեհի ռեկորդային ցուցանիշը, որոնք այդ տարիքում «Արարատի» լեգեոնականներից բոլորից շատ՝ 4-ական գոլ էին խփել:

7. «Արարատի» դարպասը պաշտպանեցին 2 դարպասապահներ: Մեկնարկային 15 հանդիպումներում դարպասի պաշտպանությունը վստահվել էր Տիագո Գոմեսին, որը 27 գոլ բաց թողեց (միջինը մեկ խաղում՝ 1,8 գոլ), 3 անգամ դարպասն անառիկ պահեց:

Վերջին 2 խաղերում թիմի դարպասը պաշտպանեց Պողոս Այվազյանը՝ բաց թողնելով 4 գոլ:

21-ամյա Տիագո Գոմեսը 2024թ. օրացուցային տարում առաջնության 31 հանդիպումներից 9-ում դարպասն անառիկ է պահել: Նա գերազանցեց թիմի նախկին դարպասապահ Արմեն Պետրոսյանի 30-ամյա վաղեմության տարիքային ռեկորդը: Վերջինս 1994թ. 21 տարեկանում առաջնության 13 խաղերից 6-ում գոլ բաց չէր թողել: Գոմեսի ցուցանիշը նաև այլազգի դարպասապահների մեջ Անատոլի Այվազովի տարիքային ռեկորդի կրկնությունն է:

8. Առաջնության աշնանային հատվածում «Արարատում»  ելույթ ունեցած ամենատարեց ֆուտբոլիստը 31-ամյա Արթուր Գրիգորյանն էր:

18-ամյա Ալեն Մկրտչյանն արարատցիներից ամենաերիտասարդն էր: Օգոստոսի 10-ին «Գանձասարի» հետ խաղում նա թիմի կազմում նորամուտը նշել էր 17 տարեկան 359 օրականում:

9. Գոռ Մալաքյանն ինչպես Բարձրագույն խմբում (245 խաղ), այնպես էլ «Արարատում» (103) անցկացրած խաղերի ընդհանուր  քանակով թիմի ներկայիս կազմի ամենափորձառու ֆուտբոլիստն է: «Արարատի» ավագը 4-րդ մրցաշրջանն է անցկացնում թիմի կազմում:

Օգոստոսի 24-ին «Վեստ Արմենիայի» հետ կայացած առաջնության մրցավեճում Գոռ Մալաքյանը ֆուտբոլային կարիերայում պաշտոնական մրցումներում հոբելյանական՝ 350-րդ խաղն անցկացրեց:

10. Առաջնության աշնանային հատվածում «Արարատի» կազմում խաղադաշտ դուրս եկան 26 ֆուտբոլիստներ, որոնցից 14-ը լեգեոնականներ էին: 11 ֆուտբոլիստներ՝ Գոռ Լուլուկյանը, Մարսելո դե Սոուզան, Քրիստոֆեր Բոնիֆեյսը, Սանդրո Տրեմուլեն, Մուսա Կանտեները, Իլարիոն Գուռը, Ալեն Մկրտչյանը, Բադեմ Դիաբիրան, Գոռ Ղուկասյանն ու Արամ Ասլանյանը նորամուտը նշեցին «Արարատում»:

Արարատցիները 30 անգամ զգուշացվել են, Գոռ Մալաքյանն ու Սանդրո Տրեմուլեն մեկական անգամ հեռացվել են խաղադաշտից: Առավել հաճախ՝ 6-ական անգամ դեղին քարտի են արժանացել Կլինտոն Դոմբիլան և Մուսա Կանտեն:

FastNews-ը ներկայացնում է «Արարատի» ֆուտբոլիստների ցուցանիշները Fastex Պրեմիեր լիգայի աշնանային հատվածում:

Ֆուտբոլիստներ	Խաղ	Գոլ	Զ (Հ)
1. Արթուր Գրիգորյան	17	-	1
2. Սերոբ Գալստյան	16	2	-
3. Կասիմ Հաջի	16	1	2
4. Կլինտոն Դոմբիլա	16	-	6
5. Մուսա Կանտե	15	5	6
6. Տիագո Գոմես	15	-27	1
7. Ալբերտ Խաչումյան	15	-	1
8. Իլարիոն Գուռ	14	6	3
9. Ալասան Ֆայե	14	-	1
10. Գոռ Լուլուկյան	14	-	-
11. Գոռ Մալաքյան	14	-	5 (1)
12. Ռայան Մզուգի	11	1	-
13. Մալիկ Ազիզ Բերտե	11	-	-
14. Վոլոդյա Սամսոնյան	9	-	-
15. Մարսելո դե Սոուզա	8	-	1
16. Արմեն Նահապետյան	7	1	1
17. Մամադու Դումբիա	7	-	-
18. Սանդրո Տրեմուլե	7	-	1 (1)
19. Ալեքսանդր  Ալեքսանյան	6	-	-
20. Ալեն Մկրտչյան	5	-	-
21. Մուսա Կանտե	3	-	-
22. Քրիստոֆեր Բոնիֆեյս	3	-	-
23. Բադեմ Դիաբիրա	2	-	1
24. Պողոս Այվազյան	2	-4	-
25. Գոռ Ղուկասյան	1	-	-
26. Արամ Ասլանյան	1	-	-