Google-ը որոշել է թարմացնել որոնման համակարգի դիզայնը՝ ազատվելով «Նորություններ», «Նկարներ», «Տեսանյութեր» և այլ ներդիրների սովորական դասավորությունից։ Նոր տեսքն արդեն առկա է ինչպես որոշ համակարգիչներում, այնպես էլ շարժական սարքերում:
Այժմ սովորական որոնման բաժինների փոխարեն Google-ն առաջարկում է ընդլայնված հուշումներ: Դրանք տեղակայված են մուտքային էջի հարթակում: Օրինակ՝ եթե օգտատերը գուգլում է «սմարթֆոններ», ապա հուշող ֆունկցիան կառաջարկի՝ «300 դոլարից ցածր», «նոր» կամ «Samsung»:
Օգտագործողները, որոնք փորձարկել են նոր դիզայնը, քննադատել են նորարարությունը: Բողոքների մեծ մասը կապված է ինտերֆեյսի ինտուիտիվության բացակայության և կանոնավոր սխալների հետ: Օրինակ՝ որոնողական համակարգը ԱՄՆ-ից մարդկանց առաջարկում է ապրանքներ փնտրել հնդկական ռուփիով։ Նորարարության մեկ այլ կարևոր թերություն է որոնման արդյունքներն ըստ հրապարակման ամսաթվի տեսակավորելու անկարողությունը, ինչը երբեմն չափազանց կարևոր է:
Մինչ նոր ինտերֆեյսը սահմանափակ փորձարկում է անցնում, դրա լայնածավալ ներդրման մասին դեռ խոսք չկա:
