Հիվանդանոցային ֆոնդի մոբիլիզացիան շարունակվում է, սակայն առողջապահական համակարգն ավելի շատ պացիենտ է ունենում, քան մոբիլիզացվող մահճակալները։ Այդ մասին կառավարության նիստում նշեց Առողջապահության նախարար Արսեն Թորոսյանը:
«Հիմա արդեն քաղաքացիներ են ընդունում Վեդու ԲԿ-ում, 60 մահճակալից զբաղված է 29-ը, մյուս մահճակալների վրա դեռ չենք հասցրել թթվածնային կետեր ավելացնել, որ բոլորն ընդունեն, նույնը Դիլիջանի ԲԿ-ում է, երկու ԲԿ էլ՝ Սպիտակի և Մարտունու, հերթի մեջ են, չհաշված՝ ռեանիմացիաները, որոնց մասին խոսել եմ՝ «Գրիգոր Լուսավորիչ»- ում, «Էրեբունի»- ում և Միքայելյան ինստիտուտում»,- ասաց նախարարը:
Նրա խոսքով՝ դրանց վերանորոգման աշխատանքներն ընթացքի մեջ են:
Հայաստանում հունիսի 18-ի առավոտյան 09:00-ի դրությամբ կորոնավիրուսով հիվանդ 143 մարդ հոսպիտալացման կարիք ունի: Նրանցից 25-ը տանն են, մյուսները` ոչ կորոնավիրուսային պրոֆիլով հիվանդանոցներում։
Երկրում հաստատվել է կորոնավիրուսային հիվանդության ընդհանուր 18 698 դեպք, որոնցից 7560-ն` առողջացած:
Կորոնավիրուսով հիվանդներից 444-ը ծանր, 131-ը՝ ծայրահեղ ծանր վիճակում են։
