Ճապոնիայում բժիշկների խումբը բարեհաջող վիրահատել է դեռևս չծնված երեխայի, որն ուներ ծանր սրտային հիվանդություն։ Սա աորտալ ստենոզի ներարգանդային բուժման առաջին դեպքն է երկրում, հայտնում է NHK -ը։
Նշվում է, որ վիրահատությունը կատարվել է հղիության 25-րդ շաբաթում գտնվող կնոջ արգանդում։ Պտղին ախտորոշվել էր աորտայի փականի ստենոզ, որի դեպքում աորտայի փականի բացվածքի նեղացումը խանգարում է սրտի մի մասի բնականոն զարգացմանը:
Սկզբում վիրաբույժները մոր որովայնի միջով հատուկ ասեղաձև խողովակ են մտցրել պտղի սրտի մեջ, իսկ հետո փչովի կաթետեր են մտցրել փականի բացվածքը լայնացնելու համար: Այս պրոցեդուրան թույլ է տվել մեծացնել արյան հոսքը դեպի սիրտ։
Փոքրիկը լույս աշխարհ է եկել հոկտեմբերին և այժմ լավ է։
