2019 թվականի սեպտեմբերի 5-ին տեղի ունեցավ իտալական «Իդեալական անծանոթներ» ֆիլմի հայկական ռիմեյքի՝ «Անհայտ բաժանորդ» ֆիլմի պրեմիերան։ Ռեժիսոր Արշո Հարությունյանը, սակայն, միայն ֆիլմով չբավարարվեց։ 6 տարի անց հավաքեց բոլոր դերասաններին և բեմադրեց ներկայացում։ Հունիսի 19-ին, Գաբրիել Սունդուկյանի անվան ազգային ակադեմիական թատրոնում կայացավ ներկայացման պրեմիերան։ Դեմքերը նույնն էին՝ Խորեն Լևոնյան, Նազենի Հովհաննիսյան, Բաբկեն Չոբանյան, Մարջան Ավետիսյան, Սոս Ջանիբեկյան, Անի Խաչիկյան և Արթուր Մանուկյա, դեպքերը ևս՝ պարզապես իրադարձություններն արդեն բեմում էին։
7 մտերիմ ընկեր հավաքվում են միասին հաճելի ժամանակ անցկացնելու։ Ընկերներից մեկը վստահեցնում է, որ շատ զույգեր կբաժանվեն, եթե նրանց զուգընկերները տեսնեն նրանց հեռախոսի պարունակությունը։ Ընկերները որոշում են սեղանին դնել բջջայինները և բարձրաձայն ընթերցել մուտքային հաղորդագրությունները, իսկ զանգերին պատասխանել բարձրախոսով։ Համերաշխ ընկերները նույնիսկ չէին էլ կարող պատկերացնել, թե ինչ կործանիչ գաղտնիքներ են բացահայտվելու այդ խաղի ընթացքում։
Բաբկեն Չոբանյանը խաղընկերներին երազանքի թիմ անվանեց։ Խոստովանեց՝ ներկայացման առաջարկն ընդունել է հաճույքով։ «Հեռախոսներից կախվածությունը արդիական խնդիր է։ Շատ կարևոր է այդ խնդրին բեմից անդրադառնալը։ Ցավոք, այս 6 տարում այդ խնդիրն ավելի է խորացել», - նշեց դերասանը։
Դերասանների մեծամասնությունն անկեղծացավ՝ իրականում նման խաղի չէր մասնակցի։ Նրանցից ոմանք նշեցին, որ յուրաքանչյուրն էլ ունի փակ թեմաներ, որոնց մասին չի ցանկանա բարձրաձայնել։
Լուսանկարները՝ «Անհայտ բաժանորդ» ինստագրամի էջից
