Անժելա Սարգսյան. սկանդալային դերասանուհի, գեղեցիկ կին, որն այսօր ապրում է ԱՄՆ-ում: Մենք զրուցել ենք Անժելայի հետ և փորձել հասկանալ՝ ինչո՞ւ նա հեռացավ Հայաստանից և ի՞նչ է անում այժմ Ամերիկայում:
– Անժելա, Հայաստանից հեռանալու հիմնական պատճառը ո՞րն էր:
– Մեքենայի տուգանքները (ծիծաղում է): Իսկ եթե լուրջ… Ամերիկան սիրում եմ, կարգ ու կանոն, ենթամշակույթների բազմազանություն, ամբողջ աշխարհը մեկ վայրում է: Ամեն օր շփվում ու առընչվում ես այլ ազգերի մշակույթների հետ: Ես այդ ամենը սիրում եմ, սիրում եմ, օրինակ, տարբեր ազգերի խոհանոցները (քանի որ տեսակով «գուրման» եմ):
– Տեղի մշակութային կյանքին հետևում կամ մասնակցում ե՞ս:
– Այո՛: Հաճախ եմ թատրոն՝ ներկայացումներ, մյուզիքլներ դիտելու գնում, մասնակցում եմ տարբեր փառատոնների: Ժամանակակից ներկայացումներից ամենաշատը հավանել եմ «Աննան և կայսրը»: Սիրում եմ նաև ֆիլմերի պրեմիերաների ներկա լինել:
-Դժվար չէ՞ առանց հայկական իրականության:
– Իհարկե ոչ: Ես Հայաստանում եմ (ծիծաղում է): Լոս Անջելեսում ավելի հայեցի հայեր են ապրում, քան Հայաստանում, այստեղի հայկական խոհանոցն ավելի հայկական է, քան մեր երկրում, այստեղ՝ ԱՄՆ-ում, մեր հայակական մշակութային արժեքներն ավելի լավ են պահպանվում, քան Հայաստանում:
Բացի այդ, այստեղ շատ հայ ընկերներ ունեմ, որոնց հետ աշխատում ենք մեր նոր ներկայացման վրա:
– Ներկայացո՞ւմ: Կմանրամասնե՞ս:
Նոր ներկայացում է: Պրեմիերան կկայանա դեկտեմբերի 3-ին Լոս Անջելեսում: Հունական պիես է, բայց մեր այստեղի հայկական իրականության մասին է. խարդախություններ, սեր, դավաճանություններ, մարդկային բարդ հարաբերություններ: Այս ամենը հագեցրել ենք հայկական իրականությամբ, հումորով և անակնկալներով: Կենտրոնական թեման է «FRAD»-ը. դրամական խարդախություններ, սնանկացում, կեղծ ապահովագրություններ, որոնց մեջ շատ հայեր են մեղադրվում: Մի խոսքով, ամենաարդիական թեմաներով ներկայացում է լինելու:
– Բավական վաղուց ես Լոս Անջելեսում: Սա քո առաջի՞ն աշխատանքն է:
– Մինչ այդ նկարահանվում էի USArmenia-ի հեռուստասերիալում, բացի այդ աշխատում եմ այլ ոլորտում էլ, որի մասին այս պահին ասել չեմ ուզում:
– Իսկ որքա՞ն ես վաստակում:
– Բազմակիորեն ավելի, քան Հայաստանում:
– Իսկ ովքե՞ր են խաղընկերներդ:
– Արամ Մխիթարյանը, որը ժամանակին Հայաստանում աշխատել է Դրամատիկական թատրոնում, իսկ հիմա այստեղ շատ սիրված դերասան է, Թադևոսյան Դավիթը, որին Երևանից որպես հատուկ հյուր ենք հրավիրել, Սեխպեյան Դավիթն ու նրա կինը (Դավիթին ճանաչում է բերել «Դժվար ապրուստ» հեռուստասերիալը, չնայած նա Ստանիսլավսկու անվան ռուսական դրամատիկական թատրոնում գլխավոր դերեր է խաղացել (ժպտում է)):
– Ներկայացման պրեմիերային մնացել է ընդամենը 3 շաբաթ. ինչպիսի՞ն է հանրության արձագանքը. մարդիկ հետաքրքրվա՞ծ են:
– Տոմսերը վաճառվում են ըստ մեր ակնկալիքների՝ շատ լավ: Բավական շատ հայտնի հյուրեր են լինելու, հատկապես Հոլիվուդից, որը ավելի է պարտավորեցնում:
– Իսկ ի՞նչ պլաններ ունես հետագայում:
– Հոլիվուդից ֆիլմի առաջարկ ունեմ: Ըստ պայամանգրի՝ դեռ չեմ կարող բարձրաձայնել, շուտով կիմանաք:
-Շնորհակալություն:
– Ես եմ շնորհակալ ինձ հիշելու համար (ժպտում է):
