«Նյու Ջեներեյշն փրոջեքթի» նախաձեռնությամբ հոկտեմբերի 26-ին Արամ Խաչատրան համերգասրահում կկայանա «Սիմֆոնիկ Հյուսթոն» խորագրով համերգը: Երեկոյին ընդառաջ տեղի ունեցած ասուլիսում մասնակիցներն ու կազմակերպիչները խոսել են սպասվող համերգից:
Մաշա Մնջոյանի խոսքով՝ այս ծրագրով ներկայանալն իր համար երկակի ոգևորություն է: «Հայաստանում սա իմ առաջին մեծ մենահամերգն է մաեստրո Երվանդ Երզնկյանի և նվագախմբի հետ։ Մեծապես կարևորում եմ իրենց գործում նվիրյալ թիմի ներգրավածությունը: Վստահ եմ, որ հանդիսատեսը մեծ բավականություն է ստանալու մոտ երկու ժամ տևող համերգից», - անկեղծացել է Մաշան։ Երգչուհին խոսել է նաև իր և մաեստրո Երզնկյանի գործակցությունից: «Մաեստրոյի հետ ծանոթ ենք ուսանողական տարիներից: Հենց այդ ժամանակներից էլ նվագախմբի հետ երգել ու մասնակցել եմ համերգների: Այդտեղից էլ ավելի մտերմիկ կապ է ձևավորվել ու երևի դրա շնորհիվ է, որ այժմ էլ համերգի փորձերը ընթանում են հարթ և առանց ստեղծագործական տարաձայնությունների», - նշել է երգչուհին:
«Նյու Ջեներեյշն Փրոջեքթի» հիմնադիր և գործադիր տնօրեն Շմավոն Գրիգորյանը հույս ունի, որ համերգը կունենա մեծ արձագանք և ամեն ինչ միայն այս նախագծով չի սահմանափակվի: Ըստ Գրիգորյանի՝ պետք է օգտագործել միջազգային կապերը և համերգը ներգրավել միջազգային հյուրախաղերի ցանկում, որոնք արդեն իսկ պլանավորված են 2025 թվականին։
Հայաստանի հանրային ռադիոյի էստրադային սիմֆոնիկ նվագախմբի գեղարվեստական ղեկավար Երվանդ Երզնկյանն էլ հավաելել է, որ Ուիթնի Հյուսթոնը Մաշա Մնջոյանի ստեծագործական գործունեության կվինտեսենցիան է: Մաեստրոն կարևոր է համարել այն փաստը, որ Մաշան իր մեկնաբանությամբ է ներկայացնում Հյուսթոնի երգերը, այլ ոչ թե նմանակում է աշխարհահռչակ երգչուհուն։ «Ըստ իս՝ Ուիթնի Հյուսթոնի նմանը չկա: Իհարկե, կան շատ լավ արտիստներ, որոնցից ես, անշուշտ, սովորում եմ, բայց նա եղել է եզակի երգչուհի: Իմ կարծիքով մոտակա տարիներին մենք նման արտիստ չենք ունենա։ Այդ պատճառով նրանից շատ բան ունենք սովորելու, քանի որ նա մեր էստրադային կուռքերից է: Հյուսթոնի երգերը ներկարացնելով պետք է հանդիսատեսին փոխանցենք իր ասելիքը», - նշեց Մաշա Մնջոյանը: Երեկոյի ընթացքում գյումրեցի երգչուհին զուգերգով կներկայանա Սոնայի, Սոնա Ռուբենյանի և Վիգեն Հովսեփյանի հետ։
«Աշխարհահռչակ Ուիթնի Հյուսթոնի ձայնը ուժի և սիրո խորհրդանիշ է, իսկ դրա միջոցով փոխանցվող էմոցիաները՝ անմահ։ Այս համերգը լինելու է բացառիկ հնարավորություն վերապրելու Ուիթնիի սիրված երգերը և զգալու այն հույզերը, որոնք մեզ պարգևել են տարիների ընթացքում», - վստահեցնում են համերգի կազմակերպիչները:
