Եգիպտոսի ազգային թանգարանի վերականգնման լաբորատորիայից անհետացել է 3000 տարվա պատմություն ունեցող ոսկյա ապարանջան: Այս մասին հաղորդում են եգիպտական լրատվամիջոցները՝ հղում անելով Զբոսաշրջության և հնությունների նախարարությանը:
Ապարանջանը վերագրվում է Եգիպտոսի 21-րդ դինաստիայի փարավոն Ամենեմոպին:
Գողության մասին հաղորդվել է սեպտեմբերի 16-ի ուշ երեկոյան, սակայն ենթադրվում է, որ գողությունը կատարվել է ավելի վաղ: Նախարարությունը, սակայն, չի նշում, թե վերականգնման լաբորատորիայում երբ է վերջին անգամ արձանագրվել գտածոյի առկայությունը:
AFP-ի փոխանցմամբ՝ գողության մասին պարզ է դարձել վերջերս կատարված գույքագրման ժամանակ: Երկրում սկսվել է ներքին հետաքննություն, սահմանային անցակետերում մարտական վիճակի են բերվել հնությունների պահպանության ծառայությունները:
Կահիրեի Թահրիր հրապարակում գտնվող թանգարանում պահպանվում է ավելի քան 170 հազար ցուցանմուշ, որոնց թվում է նաև Ամենեմոտ արքայի ոսկե դիմակը:
Նշենք, որ նոյեմբերի 1-ին սպասվում էր Եգիպտական մեծ թանգարանի հանդիսավոր բացումը:
