Ձմեռ. տաք տուն, հարմարավետ բազկաթոռ, թեյի բաժակ, տաք ծածկոց և գիրք: Իսկական ձմեռային իդեալական տեսարան: Իսկ ի՞նչ կարդալ ձմռանը:
Մենք խնդրել ենք գրականագետ, ԵՊՀ դոցենտ, «Զանգակ» հրատարակչության գրական ծրագրերի համակարգող Հայկ Համբարձումյանին խորհուրդ տալ՝ ինչ կարդալ ցուրտ եղանակին՝ ամառը չկարոտելու և ձմեռային հեքիաթը ավելի լավ զգալու համար:
1. Համո Սահյան, Ընտրանի
Հայկ Համբարձումjանը խորհուրդ է տալիս պոեզիա շատ կարդալ: Նրա սիրած պոետներից է Համո Սահյանը: Սահյանական նրբաթել պոեզիան, իր պարզությամբ և անզարդությամբ, ցույց է տալիս բնության գեղեցկությունը, օգնում տեսնել ամենահասարակ բաների մեջ գեղեցիկը և խորհրդավորը: Ընտրանու բանաստեղծությունները շատ են, ամենասիրելին ընտրելը դժվար է, բայց գրականագետը առանձնացրեց այս մեկը.
Մի փոքրիկ գիշեր,
Մի մեծ լուսին…
Աստղեր են իջել
Լեռան ուսին:
Տե՜ր, թույլ տուր մի քիչ՝
Ինձ փափագեմ,
Սե՛ր, թույլ տուր մի քիչ՝
Աչքս փակեմ…
Մի փոքրիկ լուսին,
Մի մեծ գիշեր…
Ա՜խ, լեռան ուսին
Ձյուն է իջել:
Փառքդ շատ, որ ես
Դեռ կամ, Աստված,
Ամեն ինչի հետ
Այսպես հաշտված:
2. Խալեդ Հոսեյնի, «Եվ արձագանքեցին լեռները»
թարգմանիչ՝ Անուշ Սեդրակյան
«Զանգակ» հրատարակությունը 2016 թվականին տպագրեց այս համաշխարհային բեսթսելերը: «Տարվա բոլոր եղանակներին ջերմացնող սրտառուչ մի վեպ է սա», – ասում է Հայկ Համաբարձումյանը:
Սա աֆղան գրող Խալեդ Հոսեյնիի երրորդ վեպն է: Գիրքը նման է կարճ պատմությունների հավաքածուի, ընդ որում՝ 9 գլուխներից յուրաքանչյուրը պատմվում է առանձին կերպարի կողմից։ Սյուժեի առանցքային գիծը 10 տարեկան Աբդուլլայի և նրա 3 տարեկան քրոջ՝ Փարիի ճակատագիրն է։ Հայրը որոշում է աղջնակին վաճառել Քաբուլում բնակվող մի անզավակ զույգի։ Հենց այս որոշումն էլ իրար է կապում բոլոր պատմությունները։
3.Մկրտիչ Արմեն, «Գույնզգույն թագավորություն»
Հավերժ ձմռան թագավորությունում ապրող Կատպիսի բնակիչները երեխաներից գաղտնի են պահում Գույնզգույն Թագավորության գոյությունը և հսկում Վերջին ձկնագլխի օրվա հաշիվը: Մինչդեռ ոգևորված պառավ Խարունայի պատմություններից՝ երեխաներն Իլե Տրապնայի առաջնորդությամբ ճանապարհ են ընկնում՝ սեփական աչքով տեսնելու այդ կախարդիչ գույների և համերի թագավորությունը: Մոլորվելու և սառչելու մեծ վտանգը հաղթահարելով՝ նրանք կեսգիշերին բախվում են Չհալչող սառցե տան պատերին…
«Մկրտիչ Արմենի այս վիպակը ցրտաշունչ, հավերժական ձմռան և երեխաների տաք սրտերի ու խիզախության մասին է», – պատմում է գրականագետը:
Գրքի նկարազարդումները՝ Նաիրա Մուրադյանի:
4.Ջաննի Ռոդարի, «Երկնագույն Նետը»
թարգմանիչ՝ Վահե Հակոբյան
«Հուզիչ հեքիաթ Սուրբ Ծննդյան հրաշքների մասին»:
Ըստ իտալական լեգենդի, ամեն տարի՝ Աստվածահայտնության տոնին, Բեֆանան տնետուն է շրջում և երեխաներին նվերներ բաժանում:
Ջաննի Ռոդարիի այս պատմության մեջ պառավ Բեֆանան խաղալիքների փոքրիկ խանութ ունի: Խաղալիքները, ցուցափեղկին կանգնած, հետևում են ձյունապատ փողոցի անցուդարձին: Սակայն հայտնության գիշերը նրանք կենդանություն են առնում, նստում «Երկնագույն նետ» անունով հրաշալի գնացքը և որոշում իրենք իրենց նվիրել այն երեխաներին, որոնց խեղճ ծնողները չեն կարող զավակների համար նվերներ գնել:
5. Հարփըր Լի «Ծաղրասարյակ սպանելը..»
թարգմանիչ՝ Արամ Արսենյան
«Այս գիրքը պետք է կարդալ՝ գոնե տոներին երեխաներին ավելի լավ հասկանալու համար», – ասում է Հայկ Համբարձումյանը:
Վեպի գործողությունները ծավալվում են ամերիկյան մի փոքր քաղաքում համեստ մի ընտանիքի պատմության շուրջ: Իննամյա հերոսուհու աչքերով հետևելով վեպի իրադարձություններին` սկսում ես խորհրդածել այնպիսի լուրջ հարցերի շուրջ, ինչպիսիք են հանդուրժողականությունը, արդարադատությունը, բարությունը, խիղճն ու պարտքի զգացումը:
Այս գիրքը ամերիկացիների ամենասիրելի և պարտադիր ընթերցանության վեպերից է և համաշխարհային գրականության լավագույններից մեկը:
«Կարդացե՛ք լավ գրականություն որակյալ թարգմանությամբ և տարվա բոլոր եղանակներին»:
Հայկ Համբարձումյան
