Ամերիկացի երգչուհի Լեդի Գագան և ռեժիսոր Թոդ Ֆիլիպսն Instagram-ում հայտնել են «Ջոկեր 2» ֆիլմի նկարահանումների ավարտի մասին։

Ֆիլիպսը լուսանկար է հրապարակել Լեդի Գագայի և դերասան Խոակին Ֆենիքսի մասնակցությամբ ֆիլմի նկարահանումներից։ Ֆիլմում արտիստները մարմնավորում են Ջոկերին և Հարլի Քուինին:

«Այսքանը։ Շնորհակալություն այս երկուսին (+ ամբողջ դերասանական կազմին) և լավագույն թիմին, որ կարող էր առաջարկել կինոարդյունաբերությունը: Սկզբից մինչև վերջ։ Հիմա ես պատրաստվում եմ մոնտաժի»,- ասել է ռեժիսորը։

Թոդ Ֆիլիպսի «Ջոկեր․ Խելագարություն երկուսի համար» («Joker: Folie à Deux») ֆիլմի նկարահանումները սկսվել են անցյալ տարվա դեկտեմբերին: Ֆիլմում նկարահանվել են նաև Բրենդան Գլիսոնը և Զազի Բիթցը: Պրեմիերան նախատեսված է 2024 թվականի հոկտեմբերի 4-ին։

Ավելի վաղ համացանցում տեսանյութ էր հրապարակվել, որում Լեդի Գագան «Ջոկերի» նկարահանումների ժամանակ պարում է աստիճանների վրա։ Նույն աստիճանների վրա առաջին մասում պարել է Խոակին Ֆենիքսը։