Մետաքսյա Սիմոնյան. հայ թատրոնի ու կինոյի անվանի դերասանուհի, որն իր գեղեցիկ ձայնով, ողբերգական ու կատակերգական դերերը նույնքան վարպետորեն կերտելու ունակությամբ մնաց հայ հանդիսատեսի սրտում:
10+2 փաստ Մետաքսյա Սիմոնյանի մասին
1.Մետաքսյա Սիմոնյանը ծնվել է Աշխաբադում, 1926 թվականի հունվարի 21-ին, արդեն 1933 թվականին ընտանիքի հետ տեղափոխվել է Երևան։
2.Դերասանական կարիերան սկսվել է Թատերական ինստիտուտն ավարտելուն պես՝ 1948 թվականին, սկսնակ դերասանուհու տաղանդը նկատել են և հրավիրել Երևանի Գաբրիել Սունդուկյանի անվան թատրոն։
3.Անվանի դերասանուհին նաև լավ մանկավարժական ձիրք է ունեցել և 1968 թվականից դասավանդել է Երևանի գեղարվեստա-թատերական ինստիտուտում:
4. Մետաքսյան մի դերի դերասանուհի չէր, կարիերայի ընթացքում նրան բաժին են հասել ծայրաստիճան տարբեր դերեր. դեռևս սովորելու տարիներին հաջողությամբ խաղացել է թե՛ զվարթ ու կենսախինդ Կատերինայի, թե՛ խոհուն և սիրառատ Անանիի դերերը։
5.Առաջին խոշոր ու հիշարժան դերը կերտել է «Այս աստղերը մերն են» ներկայացման շրջանակներում՝ հանդես գալով Արմանուշի կերպարում: Այս դերակատարման համար 1950 թվականին դերասանուհին արժանացել է ԽՍՀՄ Պետական մրցանակի:
6. Սիմոնյանի ստեղծագործական կյանքի գագաթնակետը կարելի է համարել Ֆեոդոր Դոստոևսկու «Ապուշը» վեպի հիման վրա բեմադրված ներկայացման մեջ կերտած Նաստասյա Ֆիլիպովնայի դերը. հարկ է նշել, որ այն համարվում է համաշխարհային դրամատուրգիայի ամենաբարդ կերպարներից մեկը: Այդ առթիվ ռուս անվանի ռեժիսոր Գեորգի Տովստոնոգովը ասել է՝ «Այսպիսի Նաստասյա Ֆիլիպովնա ես կուզեի տեսնել մեր թատրոնում»:
7. Հարկ է նաև անդրադառնալ Մետաքայաի կինոկարիերային. դերասանուհին նկարահանվել է «Անահիտ», «Արարատյան դաշտի աղջիկը», «Ո՞ւմ է ժպտում կյանքը», «Թռիչք անդունդի վրայով», «Կամոյի վերջին սխրանքը» և այլ ֆիլմերում:
8. Սիմոնյանը հանդես է եկել նաև ասմունքով. ներկայացել է թե՛ արևելահայ, թե՛ արևմտահայ գրողների ստեղծագործություններով: Խաղացել է ռադիո-հեռուստատեսային ներկայացումներում:
9.Սիմոնյանի արտիստիզմը գնահատելու հնարավորություն են ունեցել նաև արտասահմանում. նա հյուրախաղերով հանդես է եկել Մոսկվայում, Բաքվում, Թբիլիսիում, Բեյրութում, Դամասկոսում և այլուր։
10.Հայ բեմի և կինոյի անվանի դերասանուհին վախճանվել է 1987 թվականի օգոստոսի 11-ին:
+1. Երևանի Աբովյան փողոցի թիվ 20 շենքի պատին փակցվել է Մետաքսյա Սիմոնյանին նվիրված հուշատախտակ:
+2. Հայաստանում ամեն տարի հանձնվում է Մետաքսյա Սիմոնյանի անվան «Արտիստ» մրցանակը:
