Լուսանկարչի համար շատ հաճախ ամենակարևորը ճիշտ ժամանակին` ճիշտ վայրում հայտնվելն է։ Պահը, ակնթարթը որսալը հետաքրքիր ու լավ լուսանկար ունենալու ամենակարևոր պայմանն է։ Հենց այս հմտություններով ու ունակություններով է օժտված բրիտանացի փողոցային լուսանկարիչ Մեթ Ստյուարտը, որն այս ամենի հետ մեկտեղ հումորի հրաշալի զգացողություն ունի։ Նա  նկարներով պատմություններ պատմելու վարպետ է՝ ֆիքսելով առօրյա կյանքն այնպիսին, ինչպիսին կա:

 

 

Մեթ Ստյուարտը ծնվել է 1974 թվականին Լոնդոնում: Լուսանկարչության հանդեպ հետաքրքրության և սիրո համար Մեթը պարտական ​​է իր հորը։ Հենց հայրն էր, որ մանկության տարիներին որդուն  ծանոթացրել էր լուսանկարչական արվեստի հետ` նրան նվիրելով լուսանկարչության այնպիսի հայտնի վարպետների աշխատանքների ալբոմները, ինչպիսին են Ռոբերտ Ֆրանկը և Անրի Կարտիե-Բրեսոնը: Այդ գրքերն էլ  տղայի մեջ արթնացրել են կիրք ու ձգտում առ լուսանկարչությունը։

 

 

Մեթ Ստյուարտը պրոֆեսիոնալ լուսանկարիչ է: Նա ապրում է Անգլիայում և տարված է մարդկանցով ու նրանց սովորական առօրյայով: Սակայն, նրա նկարներում այդ սովորականը դառնում է հետաքրքիր այն պահից, երբ Մեթը դրանք նկատում ու ֆիքսում է միանգամայն այլ  տեսանկյունից։ Հենց այդպես ստեղծվում է առարկաների և իրավիճակների պատրանք, որոնք իրականում գոյություն չունեն:

 

 

 

Բրիտանացի հնարամիտ լուսանկարիչը նկարահանման համար օգտագործում է Leica փոքր տեսախցիկը և իր անսահման  համբերությունն ու  լավատեսությունը, որոնք էլ օգնում են նրան սպասել և անմահացնել ամենահարմար ու հաջողված պահը:

 

 

 

Նրա մոդելները սովորական անցորդներ են, որոնք նույնիսկ չեն  էլ կասկածում, որ իրենք հայտնվել են տաղանդավոր լուսանկարչի տեսադաշտում:

 

 

 

Մեթը վստահ է, որ իր նկարները ոչ մի կերպ չեն վիրավորում առանց զգուշացնելու նկարված մարդկանց: «… Մի քանիսը տեսել են  իրենց իմ լուսանկարներում գոհ ու երջանիկ արդյունքից, խնդրել են լուսանկարների տպած տարբերակները», – պատմել է լուսանկարիչը:

 

 

 

 

 

 

 

 

 

---