Լույս է տեսել «Մոր զրույցը» վերնագրով գիրք, որը նվիրված է 44-օրյա պատերազմում նահատակված Էդգար Աղաբաբյանի հիշատակին։

Գրքում մայրը մենախոսում է ոչ միայն իր որդու, այլ նաև ընթերցողի հետ։ Գրքի հեղինակը Երևանի թատրոնի և կինոյի պետական ինստիտուտի սան Լիլիթ Մովսիսյանն է, նախաբանի հեղինակը՝ արձակագիր Մարկ Արենը, խմբագիրը՝ Վովա Արզումանյանը։

«Ի սկզբանե մտադրված չեմ եղել գրել «Մոր զրույցը», քանի որ թեման շատ ծանր էր և, բացի այդ, կային ստեղծագործական մեծ վախեր։ Ստեղծագործել եմ հերոսի մայրիկի խնդրանքով, որը ցանկանում էր վառ պահել իր որդու հիշատակը և ապրեցնել նրան։ Երկար մտածելուց հետո չկարողացա մերժել Էդգարի մայրիկին, հատկապես, երբ նա ասաց, որ ամեն անգամ ինձ գրկելուց կարծես Էդգարին գրկի։ Յոթ ամիս տևեց մինչև վերջաբանին մոտենալը, և ոչ մի բառով չեմ կարող հստակ նկարագրել այն ապրումները, հույզերը, դժվարությունները, որոնց հանդիպել եմ ստեղծագործելու ճանապարհին»,- պատմում է գրքի հեղինակը։

Գրքի շնորհանդեսը կայացել է հունվարի 14-ին՝ Էդգար Աղաբաբյանի երկնային 20-ամյակի օրը։

«Գրքում մայրը մենախոսում է, չգիտեմ՝ գրելուց ինչու ընտրեցի հենց այդ ֆորմատը, և ոչ միայն զրուցում է իր որդու հետ, այլ նաև ընթերցողի։ Ամբողջովին զգացել եմ մոր կերպարը, ապրումները, կորստի ցավը․․․»,- վերհիշում է Լիլիթը։

Էդգար Աղաբաբյանը 2 ամսվա զինծառայող էր, երբ սկսվեց պատերազմը։ Անմահացել է հոկտեմբերի 3-ին՝ անօդաչու թռչող սարքի հարվածից։