Քանի որ «Ավատար. Ջրի ուղին» շարունակում է գերիշխող մնալ համաշխարհային կինովարձույթում (ներկայում բոլոր ժամանակների 4-րդ ամենաեկամտաբեր ֆիլմն է՝ 2,13 միլիարդ դոլարով), Ջեյմս Քեմերոնի ֆիլմաշարի ապագան ավելի պարզ է դառնում: Քեմերոնն արդեն նկարահանել է «Ավատար 3»-ը և չորրորդից հատվածներ, իսկ երկրորդն այնքան լավ է իրեն դրսևորել, որ հինգերորդ մասը նույնպես կնկարահանվի։

Empire ամսագրին տված նոր հարցազրույցում «Ավատար»-ի պրոդյուսեր Ջոն Լանդաուն մի քանի նոր մանրամասներ է ներկայացրել, թե ինչ կարող են սպասել երկրպագուները հաջորդ երեք շարունակություններից։ Մինչ այդ, Քեմերոնն ասել էր, որ երրորդ մասը կներկայացնի ավելի անտագոնիստական ​​Նա'վի ռասային։ Լանդաուն ասել է, որ այս խումբը «մոխրի ազգն» է, որը Empire-ի կողմից նկարագրված է որպես Նա'վիների «ագրեսիվ, հրաբխային ռասա»՝ Վարանգի գլխավորությամբ: Նրան մարմնավորելու է Չարլի Չապլինի ծոռնուհին՝ Ունա Չապլինը։

Հարցազրույցի շնորհիվ նաև հայտնի է դարձել, որ «Ավատար 4»-ը կունենա «ժամանակային առումով մեծ թռիչք», որն այնուհետև կհանգեցնի «Ավատար 5»-ին և Երկրի վրա պատմությանը:

Ինչպիսի՞ն կլինի Երկիրը «Ավատար»-ի աշխարհում: Երկրպագուները գիտեն, որ մոլորակը մահանում է, այդ իսկ պատճառով Ռեսուրսների զարգացման վարչությունը (RDA) ժամանել է Պանդորա՝ մարդկանց համար նոր կայուն մոլորակ ստեղծելու համար: Լանդաուն Empire-ին ասել է, որ ֆիլմում «գերբնակեցումը և մեր բնական ռեսուրսների սպառումը դժվարացնում են կյանքը» Երկրի վրա։ «Բայց մենք չենք ցանկանում մռայլ պատկեր ներկայացնել, թե ուր է գլորվում մեր աշխարհը: Ֆիլմերը նաև այն գաղափարի մասին են, որ մենք կարող ենք փոխել ընթացքը»։