ԱԱ-2022՝ Կորեայի հավաքական

VNews-ը շարունակում է ներկայացնել Կատարում մեկնարկած ֆուտբոլի աշխարհի 22-րդ առաջնության մասնակիցներին: Հերթը Հարավային Կորեայի հավաքականինն է, որը Մունդիալին կմասնակցի 11-րդ անգամ, 10-րդը՝ անընդմեջ:

Աշխարհի առաջնություններում Հարավային Կորեայի հավաքականի լավագույն արդյունքը եղել է տնային ԱԱ-2002-ում (4-րդ տեղ), իսկ 2010 թվականին հարավկորեացիներին հաջողվել է հաղթահարել խմբային փուլը: Մյուս բոլոր դեպքերում ասիական թիմը դուրս չի եկել խմբից:

ՖԻՖԱ-ի դասակարգման աղյուսակի 28-րդ տեղը զբաղեցնող Հարավային Կորեայի հավաքականն ընդգրկված է H խմբում և կմրցի Պորտուգալիայի, Ուրուգվայի ու Գանայի հավաքականների հետ:

Անցած ճանապարհ

Հարավային Կորեայի հավաքականը մեկնարկել է Ասիայի ընտրական գոտու երկրորդ էտապից: H խմբում հարավկորեացիները 6 խաղում տարել են 5 հաղթանակ, մեկ հանդիպում ավարտել ոչ-ոքի և վաստակած 16 միավորով գլխավորել աղյուսակը: Երրորդ փուլում կորեացիներն ընդգրկվել են A խմբում ու մրցել Իրանի, ԱՄԷ-ի, Իրաքի, Սիրիայի ու Լիբանանի հավաքականների հետ: 10 խաղից հետո վաստակած 23 միավորով Հարավային Կորեայի հավաքականը գրավել է երկրորդ տեղն ու նվաճել Մունդիալի ուղեգիր: Առաջին տեղով Կատար ուղևորվելու հնարավորություն է ստացել Իրանի հավաքականը:

Հարավային Կորեայի հավաքականը երրորդ էտապում խփել է 13 գնդակ: 3 բաց թողած գնդակն այս ընտրական գոտու բոլոր հավաքականների շրջանում լավագույն արդյունքն է: 4-ական գոլ բաց են թողել Իրանի ու Ճապոնիայի հավաքականները:

Կորեայի հավաքական-1

Խաղաոճ-տակտիկա

Վերջին շրջանում Հարավային Կորեայի հավաքականը խաղում է 4-4-2 տակտիկական դասավորությամբ, սակայն հաշվի առնելով թիմի հայտացուցակը՝ նրանք, ամենայն հավանականությամբ, աշխարհի առաջնությունում ելույթ կունենան 4-2-3-1 դասավորությամբ:

Միևնույն ժամանակ, հաշվի առնելով այն հանգամանքը, որ խմբում մրցակիցների թվում են Պորտուգալիայի ու Ուրուգվայի հավաքականները, հավանականությունը մեծ է, որ հարավկորեացիները խաղան 5 պաշտպանով մարտավարությամբ:

Հարավային Կորեայի հավաքականը եվրոպական բարձրակարգ առաջնություններում ելույթ ունեցող ֆուտբոլիստներ ունի պաշտպանությունից մինչև հարձակման գիծ: Կենտրոնական պաշտպան Կիմ Մին Ջեն շատ բարձր է գնահատվում «Նապոլիում» անցկացրած ելույթների շնորհիվ: Նա հիանալի է գործում գնդակով, իսկ խաղային դիրքը հաշվի առնելով՝ պաշտպանական գործողությունների մասին խոսելն ավելորդ է: Նրա խաղը վճռորոշ կլինի պաշտպանությունում:

Կիսապաշտպանությունում մեծ դրակատարում ունի «Օլիմպիակոսի» կենտրոնական կիսապաշտպան Հվան Ին Բոմը: Պետք է առանձնացնել նաև հենակետային կիսապաշտպան Չոն Ու Յոնին:

Հարավային Կորեայի հավաքականը հարձակողական ոճի հիանալի ֆուտբոլիստներ ունի, որոնց թվում են Սոն Հյոն Մինը («Տոտենհեմ»), Հվան Հի Չանը («Վուլվերհեմփթոն»), Լի Կան Ինը («Մալյորկա»), Հվան Իյ Ջոն («Ֆրայբուրգ»):

Հարավային Կորեայի հավաքականը շատ հասուն թիմ է, որի խաղացողներից շատերը ֆուտբոլային տարիքի ծաղկուն շրջանում են: Աստղային խաղացող Սոն Հյոն Մինի ներկայությունն էլ հավելյալ վստահություն ու մոտիվացիա կհաղորդի մյուս ֆուտբոլիստներին:

Կորեայի հավաքական-2

Հարավային Կորեայի հավաքականը բավական ագրեսիվ է ինչպես գնդակով, այնպես էլ առանց գնդակի, շատ լավ պատրաստված է օդային պայքարին: Այս հավաքականը սիրում է պրեսինգի դիմել, բարձր ինտենսիվությամբ խաղալ նույնիսկ առանց գնդակի:

Երբ գնդակը մրցակցի մոտ է, թիմը նախընտրում է խաղալ 4-1-2-3 մարտավարությամբ, սակայն համեմատաբար ուժեղ մրցակիցների հետ խաղերում գործում է նաև 4-4-2 մարտավարությամբ:

Մարզիչը

Պաուլու Բենտուն Հարավային Կորեայի հավաքականի ղեկն ստանձնել է 2018 թվականի օգոստոսին: Պորտուգալացի մասնագետն ավելի վաղ որպես գլխավոր մարզիչ աշխատել է Լիսաբոնի «Սպորտինգում», Պորտուգալիայի հավաքականում, «Կրուզեյրոյում», «Օլիմպիակոսում», Չունցինի «Լիֆանում»:

53-ամյա մասնագետի գլխավորությամբ Հարավային Կորեայի հավաքականն անցկացրել է 56 խաղ, տարել 37 հաղթանակ, կրել 7 պարտություն ու գրանցել 12 ոչ-ոքի: Նրա օրոք հարավկորեացիները խփել են 106 գնդակ, բաց թողել 40-ը:

Պաուլու Բենտուի նախընտրելի տակտիկական դասավորությունը 4-1-3-2-ն է: Բենտուն Պորտուգալիայի կրկնակի գավաթակիր և կրկնակի սուպերգավաթակիր է, Արևելյան Ասիայի առաջնության հաղթող:

Կորեայի հավաքական-3

Գլխավոր աստղը

Անկասկած, Հարավային Կորեայի հավաքականի գլխավոր աստղը «Տոտենհեմի» ֆուտբոլիստ Սոն Հյոն Մինն է: 30-ամյա խաղացողն Ասիայի հպարտությունն էր, երբ Մոհամեդ Սալահի հետ նախորդ մրցաշրջանում նվաճեց Պրեմիեր լիգայի «Ոսկե խաղակոշիկը»:

Անհատական որակներով նա հիասքանչ է, թիմային խաղի տեսանկյունից՝ նույնպես: Միայն ասել, որ Սոն Հյոն Մինը կլինի Հարավային Կորեայի հավաքականի սպառնալիքի հիմնական աղբյուրը, նույնն է, որ ոչինչ չասել: Հաշվի առնելով նրա փայլուն խաղն աշխարհի երևի թե ուժեղագույն ազգային առաջնությունում՝ Պրեմիեր լիգայում, սպասելիքները նրանից շատ ավելին են:

Թիմը կարող է ապավինել Սոնի որակներին: Նա ազատ տարածություններում հիասքանչ է գործում, մենապայքարներում՝ նույնպես:

Սոնն աչքի կընկնի նաև պաշտպանական գործողություններով՝ օգնելով թիմակիցներին ու օրինակ ծառայելով: Եթե առանցքային պահերին Սոն Հյոն Մինը կարողանա փայլել, ապա քիչ չէ հավանականությունը, որ Հարավային Կորեայի հավաքականը կարողանա հաղթահարել խմբային փուլը:

Կորեայի հավաքական-4

Սպասելիքները

Չնայած նրան, որ Պորտուգալիայի և Ուրուգվայի հավաքականներն այս խմբից դուրս գալու հիմնական հավակնորդն են, պետք չէ անտեսել Հարավային Կորեայի հավաքականին, որի ֆուտբոլիստները որակյալ են, մոտիվացված ու նվիրված: Այս հավաքականն ունի ծաղկուն շրջանում գտնվող բազմաթիվ ֆուտբոլիստներ, որոնք ելույթ են ունենում ուժեղագույն լիգաներում:

Ֆավորիտներին դիմակայելն առանցքային նշանակություն կունենա, և Հարավային Կորեայի հավաքականը կգնա հենց այդ ճանապարհով ու կփորձի կրկնել 2010 թվականի հաջողությունը՝ դուրս գալով մրցաշարի 1/8 եզրափակիչ:

Կարդացեք նաև

ԱԱ-2022-ի մասնակիցները. Սոնն ու ընկերները կփորձեն կանգնեցնել Պորտուգալիային ու Ուրուգվային

Գևորգ Մովսիսյան

Հարցում

TV Ալիք

Աղյուսակներ