Բրիտանացի երգչուհի Ադելը հրապարակել է իր նոր՝ «30» ալբոմի երգերի ցանկը, որի թողարկումը նախատեսված է նոյեմբերի 19-ին:

Արդեն հնարավոր է նախապես պատվիրել ալբոմը, ինչպես նաև հատուկ հավաքածուներ՝ բաղկացած Ադելի սկավառակից, լուսանկարից և նրա պատկերով շապիկից:

Երգչուհու հինգ տարվա ընթացքում առաջին սինգլը՝ Easy On Me, որը թողարկվել է հոկտեմբերի 15-ին, ալբոմի երկրորդ համարն է: Ընդհանուր առմամբ կա 12 երգ, որոնց վերնագրերը արտացոլում են Ադելի ավանդական հարաբերությունների թեման՝ Strangers by Nature, My Little Love, Love Is a Game: Ալբոմում ներառված է նաև All Night Parking երգը:

«30» սկավառակն արդեն անվանվել է «ամուսնալուծության ալբոմ», իսկ Easy On Me երգում երգչուհին բացատրում է, թե ինչու է որոշել բաժանվել ամուսնուց:

Ադելը գրել է, որ այդ տարիներն իր կյանքի «ամենաբուռն շրջանն» էին, բայց նա հաղթահարել է դժվարությունները և այժմ իրեն ավելի խաղաղ է զգում, քան երբևէ:

Երգչուհին վերջերս հաստատել է իր սիրավեպը սպորտային գործակալ Ռիչ Փոլի հետ: