Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ:
Ձեր ուշադրությանն ենք ներկայացնում հուլիսի 4-ի իրադարձությունների քրոնիկոնը:
«Ալաշկերտը» դուրս է եկել Չեմպիոնների լիգայի գավաթի խաղարկության որակավորման 2-րդ փուլ: Առաջին խաղում Անդորրրայի «Սանտա-Կոլոմային» 1-0 հաշվով հաղթելուց հետո Հայաստանի չեմպիոնը հյուրընկալվելիս գրանցել է ոչ-ոքի՝ 1-1: Ուրոշ Նենադովիչի գոլին պատասխանել է Իլդեֆոնս Լիման: «Ալաշկերտի» մրցակիցը մյուս փուլում կլինի Բելառուսի «ԲԱՏԵ»-ն:
Եվրոպա լիգայի գավաթի խաղարկության որակավորման 1-ին փուլի պատասխան խաղում Լյուքսեմբուրգի «Պրոգրեսը» հյուրընկալել է «Գլազգո Ռեյնջերսին» և հաղթել 2-0 հաշվով և, երկու խաղերի արդյունքում առավելության հասնելով 2-1 հաշվով, դուրս եկել 2-րդ փուլ: Ալեքսանդր Կարապետյանը եղել է հիմնական կազմում և փոխարինվել 84-րդ րոպեին: «Պրոգրեսի» հաջորդ մրցակիցը Կիպրոսի «ԱԵԼ»-ն է:
Մաուրո Գևգեոզյանը մոտ է «Նյուելս Օլդ Բոյզ» տեղափոխվելուն, որն Արգենտինայի այս առաջնությունում կիսում է 9-11-րդ տեղերը 30 թիմերի պայքարում: Հարձակվողը «Տեմպեռլեյում» այս մրցաշրջանում անցկացրած 16 մրցավեճում դարձել է 7 գոլի հեղինակ: Այս ակումբում է ֆուտբոլում իր առաջին քայլերը կատարել Լիոնել Մեսին, հանդես են եկել նաև Դիեգո Մարադոնան և Գաբրիել Բատիստուտան:
Իլշատ Ֆայզուլինը նշանակվել է «Բանանց ՖԱ»-ի ակադեմիայի տնօրենի պաշտոնում: Նա մարզչական կրթությունն ու ՈՒԵՖԱ-ի PRO արտոնագիրը ստացել է Իսպանիայի ֆուտբոլի ֆեդերացիայում: Ֆայզուլինը եղել է Մոսկվայի «Լոկոմոտիվի» ֆուտբոլային դպրոցի երիտասարդական ֆուտբոլի զարգացման ծրագրի ղեկավարն ու ուսումնամարզական աշխատանքներով տնօրենի տեղակալը:
«Փյունիկի» պատվիրակությունը մեկնել է Բրատիսլավա, որտեղ հուլիսի 6-ին Եվրոպա լիգայի շրջանակներում կհյուրընկալվի «Սլովանին»: Վերջինս Երևանում հաղթանակ էր տոնել 4-1 հաշվով:
«Ուրալն» ընկերական խաղում մրցել է Սերբիայի «Պարտիզանի» հետ և պարտություն կրել 0-1 հաշվով: Էդգար Մանուչարյանը հանդիպումը բաց է թողել վնասվածքի պատճառով, իսկ թիմում փորձաշրջան անցնող Վարազդատ Հարոյանը մասնակցել է ամբողջ խաղին:
ՉԼ որակավորման 1-ին փուլում Էստոնիայի «Ինֆոնետ Տալինը» սեփական հարկի տակ 0-1 հաշվով պարտվել է Մալթայի «Հիբերնիանսին» և դուրս մնացել հետագա պայքարից: Սերգեյ Թումասյանը մնացել է պահեստայինների նստարանին, իսկ Ալեքսանդր Թումասյանը եղել է հիմնական կազմում և փոխարինվել 65-րդ րոպեին:
Մոսկվայի «Արարատը» Ռուսաստանի գավաթի խաղարկության 1/128 եզրափակիչ փուլում ուժերը կչափի «Դոլգոպրուդնիի» հետ: Հանդիպումը կկայանա հուլիսի 23-ին:
