Ֆուտբոլի Հայաստանի ազգային հավաքականի նորանշանակ գլխավոր մարզիչ Ալեքսանդր Պետրակովը մարտի 17-ին Վազգեն Սարգսյանի անվան «Հանրապետական» ստադիոնի մամուլի ասուլիսների սրահում հանդիպեց լրագրողների հետ։ Դա ուկրաինացի մասնագետի առաջին ասուլիսն է Հայաստանի հավաքականի գլխավոր մարզիչի պաշտոնում: Ասուլիսից առաջ Ալեքսանդր Պետրակովը ներկայացրեց Հայաստանի հավաքականի կազմը։
«2019 թվականին Ուկրաինայի Մ20 հավաքականի հետ հաջողությունն անցյալում է, ես միշտ մոռանում եմ անցյալը և նայում ապագային։ ՀՖՖ-ի նախագահն իմ առջև առաջադրանք է դրել փորձել դուրս գալ Եվրո-2024-ի եզրափակիչ փուլ։
Թուրքիայի դեմ առաջին խաղից առաջ պետք չէ ոչինչ քաղաքականացնել ու չափն անցնել, առաջին պլանում պետք է լինի ֆուտբոլը։ Հավաքականի տղաները փորձառու ֆուտբոլիստներ են, շատերը գալիս են արտերկրից ու լավ գիտեն իրենց պատմությունը։ Ես նույնպես լավ գիտեմ ձեր պատմությունը։ Առաջիկա խաղում ինձ համար առաջին տեղում միայն սպորտն է։ Բոլորը հասկանում են, որ խաղն այլ հարթության վրա դնելը կարող է միայն բացասաբար ազդել։
Հայաստանում եմ մոտավորապես երկու ամիս և դեռ հունվարին եմ ծանոթացել որոշ խաղացողների հետ։ Նաև ներկա եմ եղել հավաքականի խաղացողների հավաքներին։ Ես հրավիրել եմ բոլոր լեգեոնականներին, որպեսզի տեսնեմ նրանց խաղը։ Տեսանյութերն ու հեռախոսազանգերը երբեք չեն կարող փոխարինել մարդկանց հետ ուղիղ շփումները։ Մարզիչը պետք է խաղացողներին տեսնի մարզումային գործընթացում։ Հեռախոսազրույցներով տպավորություն ունեմ, որ շատ լավ տղաներ են։ Կան տարբեր լեզուներով խոսող խաղացողներ։
Ինչ վերաբերում է նորեկներին, օբյեկտիվորեն չեմ կարող ասել, որ նրանք նոր բան կբերեն հավաքական։ Ժամանակ է հարկավոր, որպեսզի ծանոթանանք նրանց ու նրանց խաղային որակներին։ Չեմ կարող ժամանակից առաջ ընկնել։ Շատ կցանկանամ, որ նրանք ուժեղացնեն թիմը։ Մարզչական աշխատանքը ստեղծագործ է։ Ես մարզիչ եմ և կարող եմ նաև սխալվել։ Մարզիչն ունի սխալվելու իրավունք։
Մեր ընտրական խմբի մասին կասեմ, որ թույլ ենթախմբեր չեն լինում։ Միանշանակ, խմբի ֆավորիտն աշխարհի առաջնության բրոնզե մեդալակիր Խորվաթիայի հավաքականն է։ Ուելսի հավաքականի դեմ խաղացել և պարտվել եմ Ուկրաինայի հավաքականի հետ։ Չեմ կարող ասել, որ մեր խմբի թիմերից մեկը թույլ է։ Սա ֆուտբոլ է, և որևէ մրցակցի թերագնահատելը կարող է բացասաբար ազդել թիմի։ Բոլոր մրցակիցներին հարգում եմ։ Կարծում եմ՝ կլինի հետաքրքիր պայքար։ Կցանկանայի, որ սկզբում նաև հաջողությունը մեր կողմը լինի։ Իհարկե, հաջողությանը պետք է արժանանալ։
Դեռ չեմ որոշել, թե առաջիկա խաղերում ով է պաշտպանելու մեր թիմի դարպասը։ Լիովին վստահում եմ Ռոման Բերեզովսկուն, սակայն միշտ ինքս եմ կայացնում որոշում։ Կոլեկտիվ պատասխանատվությունը դա անպատասխանատվություն է։ Որոշումը պետք է կայացնի գլխավոր մարզիչը։
Հայ և ուկրաինացի ֆուտբոլիստների միջև համեմատականներ չեմ կարող տանել, քանի որ դեռ մարզում չեմ անցկացրել այստեղ։ Խնդրահարույց խաղային դիրքերի մասին կասեմ, որ Հայաստանում շատ բարդ է պաշտպանների հարցում։ Երբեք չէի սպասի, որ բարդ է գտնել պաշտպանների։ Ինձ շատ դուրս եկան Ստյոպա Մկրտչյանն ու Արման Ղազարյանը, սակայն նրանք պատրաստ չեն վնասվածքների պատճառով։ Այդ պատճառով որոշեցի նրանց փոխարեն հավաքական հրավիրել խաղային պրակտիկա ունեցող ֆուտբոլիստների։ Դարպասապահի դիրքի մասին չեմ հիշեցնի, ինքներդ նշեցիք դա։ Երիտասարդ տղաներ են աճում։ Կտեսնենք, թե ինչպես է առաջադիմում Արման Ներսեսյանը։ Եկեք ավելի ուշ վերադառնանք այդ հարցին։
Այս պահին հայ ֆուտբոլիստներին ամենաշատ խաղաժամանակ տալիս է «Ուրարտուն» և նաև խաղացողներ է տրամադրում հավաքականին։
Ես երբեք չեմ քննարկում իմ կոլեգաներին։ Բոլոր մարզիչներին հարգում եմ։ Մենք ունենք ծանր մասնագիտություն»,- ասաց մարզիչը։
Հիշեցնենք, որ Հայաստանի հավաքականն Ալեքսանդր Պետրակովի գլխավորությամբ առաջին հանդիպումը կանցկացնի մարտի 25-ին՝ Եվրո-2024-ի ընտրական փուլի առաջին տուրում Վազգեն Սարգսյանի անվան «Հանրապետական» ստադիոնում ընդունելով Թուրքիայի թիմին։ Երեք օր անց Հայաստանի հավաքականը Երևանում ընկերական խաղ կանցկացնի Կիպրոսի թիմի հետ: Եվրո-2024-ի ընտրական փուլում Ալեքսանդր Պետրակովի թիմի մրցակիցներն են նաև Խորվաթիան, Ուելսը և Լատվիան։
Ալեքսանդր Պետրակով․ «Հենրիխ Մխիթարյանը չցանկացավ հանդիպել ինձ հետ» (տեսանյութ)
