Փարիզի 2024 թվականի Օլիմպիական խաղերի բրոնզե մեդալակիր Մալխաս Ամոյանը (77 կգ) դուրս է եկել Զագրեբում մեկնարկած հունահռոմեական ոճի ըմբշամարտի աշխարհի առաջնության եզրափակիչ:

Եվրոպայի քառակի չեմպիոնը կիսաեզրափակիչում 5-1 հաշվով հաղթել է իրանցի Ալիռեզա Մորադ Աբդևալիին: 

Ներկայացնում ենք 26-ամյա Ամոյանի հաղթական գոտեմարտը` 

2022 թվականի աշխարհի չեմպիոնը պայքարը սկսել էր 1/16 եզրափակիչից, որտեղ 2-1 հաշվով հաղթել էր ԱՄՆ-ի ներկայացուցիչ Քամալ Բեյին, 1/8 եզրափակիչում 10-0 հաշվով վաղաժամ հաղթանակ էր տարել լեհ Մատեուշ Բերնատեի դեմ գոտեմարտում, իսկ քառորդ եզրափակիչում 3-1 հաշվով հաղթել էր թուրք Ահմետ Յիլմազին:

Ամոյանը սեպտեմբերի 19-ին եզրափակիչում կմրցի Փարիզի 2024 թվականի Օլիմպիական խաղերի հաղթող, Ճապոնիայի ներկայացուցիչ Նաո Կուսակայի դեմ:

«Ֆասթ Սպորտ» հեռուստաալիքները («Ֆասթ Սպորտ», «Ֆասթ Սպորտ 1», «Ֆասթ Սպորտ 2») ցուցադրում են ըմբշամարտի աշխարհի առաջնությունը` սկսած կիսաեզրափակիչի գոտեմարտերից: Բոլոր քաշային կարգերի կիսաեզրափակիչի և մեդալային գոտեմարտերը ցուցադրվում են նաև Fast TV հավելվածում (iOS, Android):