«Բարսելոնայի» ավագի թևկապից զրկված գերմանացի դարպասապահ Մարկ-Անդրե տեր Շտեգենն X սոցիալական ցանցի իր էջում հանդես է եկել ծավալուն հայտարարությամբ.
«Վերջին մի քանի ամիսները չափազանց դժվար էին ինձ համար թե՛ ֆիզիկական, թե՛ անձնական առումով։ Ինչպես ցանկացած խաղացողի, վնասվածքից հետո իմ միակ առաջնահերթությունը միշտ եղել է հնարավորինս շուտ խաղադաշտ վերադառնալը՝ ցանկանալով օգնել թիմին և անել այն, ինչն ամենաշատն եմ սիրում՝ ֆուտբոլ խաղալ։
Վերջին շաբաթներին շատ բան է խոսվել իմ մասին, այդ թվում՝ լիովին անհիմն։ Հետևաբար, անհրաժեշտ եմ համարում հարգալից, բայց հստակ ներկայացնել իրադարձությունների իմ տարբերակը։
Վիրահատության որոշումը կայացվել է բժշկական մասնագետների հետ խորհրդակցությունից հետո և լիովին հաստատվել է ակումբի կողմից։ Միշտ փորձել եմ իմ առողջությունն ու երկարատև մարզական կարիերան դնել առաջին տեղում, ինչը, իհարկե, ակումբի շահերից է բխում, որպեսզի կարողանամ որքան հնարավոր է շուտ վերադառնալ խաղադաշտ և շարունակել գավաթներ նվաճել։ Դրանից բացի, ես հրապարակավ հայտարարել եմ վիրահատությունից հետո ինձ անհրաժեշտ նվազագույն վերականգնման ժամանակահատվածի մասին, որն ինձ հայտնել են առաջատար մասնագետները, այն համաձայնեցվել է ակումբի հետ։
Որոշ ենթադրությունների լույսի ներքո ես նաև կցանկանայի պարզաբանել, որ ակումբի կողմից բոլոր ստորագրումները և պայմանագրերի երկարաձգումները կատարվել են իմ վիրահատությունից առաջ, և, հետևաբար, ես ոչ մի կերպ չէի կարող ենթադրել, որ դժբախտ հանգամանքները կապված են նոր վիրահատության հետ։ Թիմակիցներիս նկատմամբ մեծ հարգանք ունեմ, անհամբեր սպասում եմ նրանց հետ հանդերձարան կիսելուն շատ մրցաշրջանների ընթացքում։ Ցանկացած այլ մեկնաբանություն ինձ համար անարդար և սխալ է թվում։
Իմ կարիերայի ընթացքում ես միշտ փորձել եմ ինձ պահել պրոֆեսիոնալ, հարգալից և նվիրված այն թիմերի նկատմամբ, որոնց ներկայացրել եմ։ Ես խոր կապվածություն ունեմ «Բարսելոնայի», այս քաղաքի և նրա երկրպագուների հետ, որոնք տարիներ շարունակ աջակցել են ինձ։ Իմ հավատարմությունն այս գույներին մնում է անսասան։
Ես հասկանում եմ, որ դժվար պահերը կարող են լարվածություն առաջացնել, բայց կարծում եմ, որ երկխոսության և պատասխանատու վերաբերմունքի միջոցով մենք կարող ենք կառուցողականորեն լուծել այս իրավիճակը։ Ես լիովին հանձնառու եմ ղեկավարության հետ գործակցելուն՝ այս խնդիրը լուծելու համար»,- գրել է գերմանացին:
Ավելի վաղ հաղորդվում էր, որ 2014 թվականից կատալոնական գրանդում հանդես եկող Տեր Շտեգենը հրաժարվել էր իր վնասվածքի և մեջքի վիրահատության վերաբերյալ զեկույցը Լա լիգայի բժշկական հանձնաժողովին փոխանցելուց: Դրա հետևանքով «Բարսելոնան» թիմի նոր դարպասապահ Ժոան Գարսիային դեռևս չի կարողանում գրանցել Լա լիգայի նոր մրցաշրջանի համար:
«Մարկ-Անդրե տեր Շտեգենի դեմ հարուցված կարգապահական վարույթի կապակցությամբ և մինչև այս հարցի վերջնական լուծումն ակումբը, մարզական ղեկավարության և մարզչական անձնակազմի հետ փոխադարձ համաձայնությամբ, որոշել է ժամանակավորապես զրկել նրան ավագի թևկապից։ Այս ընթացքում ավագի պարտականությունները կկատարի ներկայիս փոխավագ Ռոնալդ Արաուխոն»,- այսպիսի հաղորդագրություն էր օգոստոսի 7-ին տարածել «Բարսելոնայի» մամուլի ծառայությունը:
🔵🔴 @FCBarcelona pic.twitter.com/62OpfDqJeQ
— Marc ter Stegen (@mterstegen1) August 8, 2025
