Ֆուտբոլի Արգենտինայի հավաքականը պատմության մեջ երրորդ անգամ դարձավ աշխարհի չեմպիոն։

Կատարում ավարտված աշխարհի 22-րդ առաջնության եզրափակիչում Ամերիկայի գործող գավաթակիրը հետխաղյա 11-մետրանոց հարվածաշարում հաղթեց Ֆրանսիայի հավաքականին, որը չկարողացավ պաշտպանել աշխարհի չեմպիոնի տիտղոսը։ «Լուսաիլ» ստադիոնում կայացած խաղն անցավ խելահեղ սցենարով։ 2-0, 2-2, 3-2, 3-3 ու հաղթանակ 11-մետրանոցներով։ Դա մի տեսարան էր, որը հնարավոր չէր պատկերացնել առանց տեսնելու։

Մունդիլաների պատմության ամենադիտարժան եզրափակիչի սկզբնամասում արգենտինացիներն ավելի ակտիվ էին, իսկ խաղային առավելությունը գոլի վերածեցին 23-րդ րոպեին։ Թուրինի «Յուվենտուսի» կիսապաշտպան Անխել Դի Մարիան վաստակեց 11-մետրանոց հարված, որն անվրեպ իրացրեց ֆրանսիական ՊՍԺ-ի հարձակվող Լիոնել Մեսին։ «Ոսկե գնդակի» 7-ակի դափնեկիրը դարձավ պատմության առաջին ֆուտբոլիստը, որը աշխարհի առաջնությունում գոլ է խփել խմբային փուլում, 1/8 եզրափակիչում, քառորդ եզրափակիչում, կիսաեզրափակիչում և եզրափակիչում:

35-ամյա Մեսին 26-րդ խաղն էր անցկացնում Մունդիալներում։ Նա գերազանցեց գերմանացի լեգենդար պաշտպան Լոթար Մատեուսի ռեկորդը և դարձավ աշխարհի առաջնություններում ամենաշատ խաղեր անցկացրած ֆուտբոլիստը։

Լիոնել Սկալոնիի թիմը բոլոր առումներով գերազանցում էր մրցակցին, իսկ 36-րդ րոպեին նաև կրկնապատկեց առավելությունը։ Արգենտինացիների տպավորիչ հակագրոհը գոլով եզրափակեց Անխել դի Մարիան։ «Յուվենտուսի» 34-ամյա կիսապաշտպանը դարձավ առաջին ֆուտբոլիստը, որը գոլ է խփում աշխարհի առաջնության, Ամերիկայի գավաթի և Օլիմպիական խաղերի եզրափակիչներում։

Ֆրանսիայի հավաքականն այնքան վատ տեսք ուներ առաջին խաղակեսում, որը թիմի գլխավոր մարզիչ Դիդյե Դեշամը 41-րդ րոպեին կատարեց 2 փոխարինում՝ Օլիվյե Ժիրուի և Ուսման Դեմբելեի փոխարեն խաղադաշտ դուրս բերելով Մարկուս Թյուրամին ու Ռանդալ Կոլո Մուանիին։ Թիմերն ընդմիջման գնացին 2-0 հաշվի ժամանակ։ 

Երկրորդ խաղակեսում ևս արգենտինացիներն ավելի լավ տեսք ունեին։ Նրանք կարծես խաղը տանում էին հաղթական ավարտի, սակայն 80-րդ րոպեին ամեն ինչ գլխիվայր շրջվեց։ Լիսաբոնի «Բենֆիլայի» արգենտինացի պաշտպան Նիկոլաս Օտամենդին անվստահ գործեց, ինչից հետո սեփական տուգանային հրապարագում գցեց մրցակցին։ 11-մետրանոցը վստահորեն իրացրեց ՊՍԺ-ի հարձակվող Կիլիան Մբապեն, որը մեկ րոպե անց նաև հավասարեցրեց հաշիվը։ Լիոնել Մեսին դաշտի կենտրոնական հատվածում կորցրեց գնդակը, ինչից հետո ֆրանսիացիներն անցկացրին տպավորիչ կոմբինացիա, իսկ 23-ամյա Մբապեի գոլը ստացվեց ոչ պակաս տպավորիչ՝ 2-2։ 

Հոգեբանական առավելություն ստացած ֆրանսիացիները վերջնամասում ավելի ակտիվ էին, բայց դարպասի նոր գրավում չարձանագրվեց և հանդիպումը տեղափոխվեց լրացուցիչ ժամանակ:

Լրացուցիչ ժամանակում հարավամերիկյան թիմը դարձյալ առաջ անցավ հաշվի մեջ։ 109-րդ րոպեին Լիոնել Մեսին դարձավ դուբլի հեղինակ, սակայն այս անգամ ևս ֆրանսիացիները կարողացան պատասխանել։ 118-րդ րոպեին Կիլիան Մբապեն անվրեպ իրացրեց 11-մետրանոցը՝ հավասարեցնելով հաշիվն ու դառնալով հեթ-տրիկի հեղինակ։ Մբապեն չորրորդ գոլը խփեց Մունդիալների եզրափակիչներում՝ սահմանելով ռեկորդ։ 

Լրացուցիչ ժամանակի վերջին վայրկյաններին թիմերը կորցրին մեկական իրական գոլային պահ։ Ֆրանսիացիներից դարպասը գրավել չկարողացավ Ռանդալ Կոլո Մուանին, իսկ արգենտինացիներից՝ փոխարինման դուրս եկած Լաուտարո Մարտինեսը։ 

Հաղթողը որոշվեց հետխաղյա 11-մետրանոց հարվածաշարում, որտեղ հաջողությունն ուղեկցեց արգենտինացիներին՝ 4-2: Արգենտինայի հավաքականից դիպուկ էին Լիոնել Մեսին, Պաուլո Դիբալան, Լեանդրո Պարեդեսն ու Գոնսալո Մոնտիելը։ Ֆրանսիայի հավաքականի կազմում Մբապեն ու Կոլո Մուանին գրավեցին դարպասը, իսկ Կինգսլի Կոմանն ու Օրելյեն Չուամենին վրիպեցին։ 

Հիշեցնենք, որ Արգենտինայի հավաքականն աշխարհի չեմպիոն դարձել էր նաև 1978 և 1986 թվականներին։

ԱԱ-2022-ում Լիոնել Սկալոնիի թիմը փլեյ-օֆֆի ուղեգիր էր նվաճել՝ 6 միավորով հաղթելով C խմբում: Մեկնարկային տուրում Արգենտինայի հավաքականը 1-2 հաշվով սենսացիոն պարտություն էր կրել Սաուդյան Արաբիայից, որից հետո միևնույն՝ 2-0 հաշվով առավելության հասել մեքսիկացիների ու լեհերի նկատմամբ: 1/8 եզրափակիչում Ամերիկայի գավաթակիրը 2-1 հաշվով պայքարից դուրս էր թողել Ավստրալիային, քառորդ եզրափակիչում հետխաղյա 11-մետրանոցներով հաղթել էր Նիդերլանդներին (2-2, 4-3), իսկ կիսաեզրափակիչում 3-0 հաշվով վստահ հաղթանակ էր տարել խորվաթների նկատմամբ:

ԱԱ-2022, եզրափակիչ

Արգենտինա - Ֆրանսիա՝ 3-3 (11-մետրանոցներով՝ 4-2) (տեսանյութ)

Լիոնել Մեսի, 23 (11մ․), 109, Անխել Դի Մարիա, 36 - Կիլիան Մբապե, 80, 81, 118 (11մ․)