UFC-ի թեթև քաշային կարգի դասակարգման առաջատար Արման Ծառուկյանն ազատ ոճի ըմբշամարտի Եվրոպայի քառակի չեմպիոն, աշխարհի առաջնության քառակի բրոնզե մեդալակիր Արսեն Հարությունյանի, խառը մենամարտերի հայ մարտիկ Էդուարդ Վարդանյանի և Մոսկվայի մարզի MMA-ի ֆեդերացիայի փոխնախագահ Արմեն Ղուլյանի հետ Հայոց ցեղասպանության 110-րդ տարելիցին այցելել է Ծիծեռնակաբերդի հուշահամալիր: Ծառուկյանը սոցցանցերում տեսանյութ է հրապարակել և գրառում կատարել:
«Այսօր այցելեցինք Ծիծեռնակաբերդ՝ մեր հարգանքի տուրքը մատուցելու Հայոց ցեղասպանության անմեղ զոհերի հիշատակին։ Խոնարհվում ենք նրանց հիշատակի առաջ, ովքեր 1915-ին զոհ գնացին մեր ազգի ցավոտ պատմության ամենամութ էջին:
Սերունդներ անց մենք դեռ կանգուն ենք՝ հիշելով, չմոռանալով և շարունակելով մեր ճանապարհը հպարտությամբ։
Ոչ ոք մոռացված չէ, ոչինչ մոռացված չէ։
Մենք հիշում ենք…
չենք լռում։ Չենք մոռանում»,- գրել է հայ մարտիկը:
