Արսեն Ջուլֆալակյանը վերընտրվել է որպես Ըմբշամարտի համաշխարհային միության մարզիկների հանձնաժողովի նախագահ, հաղորդում է UWW-ի պաշտոնական կայքը:
Լոնդոնի Օլիմպիական խաղերի արծաթե մեդալակիր Ջուլֆալակյանը 2021 թվականին է առաջին անգամ ընտրվել այս պաշտոնում: Նա կպաշտոնավարի ևս չորս տարի:
«Շատ շնորհակալ եմ ըմբշամարտի հանրությանն ինձ կրկին վստահելու համար: Կանեմ հնարավոր ամեն ինչ՝ լսելու ու բարձրաձայնելու մարզիկների խնդիրներն ամբողջ աշխարհում:
Հատուկ շնորհակալություն Ըմբշամարտի համաշխարհային միության նախագահ Նենադ Լալովիչին և ազգային ֆեդերացիաների ներկայացուցիչներին աջակցության համար»,- ասել է Ջուլֆալակյանը:
UWW-ի որակավորման և խոշոր մրցաշարերը, սկսած կիսաեզրափակիչից, ցուցադրվում են «Ֆասթ Սպորտ» հեռուստաալիքների («Ֆասթ Սպորտ», «Ֆասթ Սպորտ 1», «Ֆասթ Սպորտ 2») ուղիղ եթերում: Կիսաեզրափակիչ փուլից սկսած՝ բոլոր գոտեմարտերը հեռարձակվում են Fast TV հավելվածում (iOS, Android):
