Գերմանիայի Լայպցիգ քաղաքում ավարտվող սպորտային մարմնամարզության Եվրոպայի առաջնությունում Արթուր Դավթյանը դարձավ աշխարհամասի եռակի չեմպիոն։
Օլիմպիական խաղերի արծաթե, բրոնզե մեդալակիր ու աշխարհի չեմպիոն Դավթյանը հենացատկ վարժությունում վաստակել է 14,799 միավոր և արժանացել ոսկե մեդալի։ Երկրորդ տեղը 14,733 միավորով զբաղեցրել է Ջեյք Ջարմանը (Մեծ Բրիտանիա), եռյակը եզրափակել է Նազար Չեպուռնին (Ուկրաինա, 14,583)։
Դավթյանը Եվրոպայի չեմպիոն դարձել է նաև 2021 և 2023 թվականներին։
Եվրոպայի այս առաջնությունում նժույգ թափերում չեմպիոն է դարձել Համլետ Մանուկյանը։ Նույն վարժությունում արծաթե մեդալ է նվաճել Մամիկոն Խաչատրյանը, իսկ Արթուր Ավետիսյանն օղակներում բրոնզե մեդալ է հաղթել։
