Շանթ Սարգսյանը, Ռոբերտ Հովհաննիսյանը, Գաբրիել Սարգսյանը, Հայկ Մարտիրոսյանն ու Կարեն Գրիգորյանը կմասնակցեն ՖԻԴԵ-ի աշխարհի գավաթի խաղարկությանը, հայտնում է Հայաստանի շախմատի ֆեդերացիայի մամուլի ծառայությունը։

Մրցաշարը կանցկացվի նոկաուտ համակարգով, կունենա 8 խաղափուլ։ Շախմատիստները կանցկացնեն երկու դասական պարտիա։ Եթե հաշիվը լինի 1-1, հաղթողը կորոշվի արագ և կայծակնային շախմատի թայ-բրեյքում։

Հայաստանի ներկայացուցիչների առաջին մրցակիցները.

• Ռոբերտ Հովհաննիսյան - Մոհան Հավին (Մալայզիա)
• Հայկ Մարտիրոսյան - Սատիրա Դուտա Չահայայ (Ինդոնեզիա)
• Գաբրիել Սարգսյան - Ռանինդու Դիլշան Լիանագե (Շրի Լանկա)
• Կարեն Գրիգորյան - Ահմեդ Ադլի (Եգիպտոս)

Շանթ Սարգսյանը մրցաշարի 50 ամենաբարձր վարկանիշ ունեցող շախմատիստների թվում է և ազատված է առաջին փուլից։

Աշխարհի գավաթի խաղարկությունը կանցկացվի Հնդկաստանի Գոա նահանգում նոյեմբերի 1-26-ը։ Առաջին փուլի պարտիաները կմեկնարկեն Երևանի ժամանակով 13:30-ին։