Մելբուրնում ավարտին մոտեցող «Մեծ սաղավարտի» տարվա առաջին մրցաշար Ավստրալիայի բաց առաջնության կանանց մենախաղի հաղթողի կոչումը կվիճարկեն Ղազախստանը ներկայացնող ռուս թենիսիստուհի Ելենա Ռիբակինան ու բելառուս Արինա Սոբոլենկոն։

Երկրորդ կիսաեզրափակիչում աշխարհի 5-րդ ռակետ Սոբոլենկոն երկու սեթում 7-6 (7-1), 6-2 հաշվով առավելության հասավ լեհ Մագդա Լինետի նկատմամբ (45-րդ ռակետ): Մրցախաղը տևեց 1 ժամ 31 րոպե։

Ավելի վաղ Ելենա Ռիբակինան կիսաեզրափակիչում 7-6, 6-3 հաշվով հաղթել էր բելառուս Վիկտորիա Ազարենկոյին:

24-ամյա Արինա Սոբոլենկոն կարիերայում առաջին անգամ կխաղա «Մեծ սաղավարտի» մրցաշարի մենախաղի եզրափակիչում։

Սոբոլենկո - Ռիբակինա եզրափակիչ մրցախաղը տեղի կունենա հունվարի 28-ին և կմեկնարկի Երևանի ժամանակով 12:30-ին:

Հիշեցնենք, որ նախորդ տարի Australian Open-ի կանանց մենախաղում հաղթել էր ավստրալացի Էշլի Բարթին: