Եվրոգավաթների ընթացիկ խաղարկությունում հայկական 4 ակումբներից վերջինը պատասխան հանդիպումն անցկացրած «Բանանցն» էլ դուրս մնաց մրցաշարից՝ կրկին պարտվելով բոսնիական «Սարաևոյին»: Հանդիպման ամենաուշագրավ իրադարձությունները ներկայացնում ենք 10 փաստի տեսքով:
1. Եվրոգավաթների ընթացիկ խաղարկությունը 12-րդն էր «Բանանցի» համար, որը կրկին չկարողացավ հաղթահարել առաջին փուլի արգելքը՝ երկու հանդիպումներում էլ զիջելով բոսնիական «Սարաևոյին»:
Եվրոպական ասպարեզում իր ելույթների 15-ամյա պատմության ընթացքում «Բանանցին» առայժմ միայն մեկ անգամ է հաջողվել հաջորդ փուլի ուղեգիր նվաճել: Նման հաջողության «Բանանցի» ֆուտբոլիստները հասել են 2005/06թթ. ՈՒԵՖԱ-ի գավաթի խաղարկությունում՝ երկու խաղերի ընդհանուր արդյունքով առավելության հասնելով Թբիլիսիի «Լոկոմոտիվի» նկատմամբ (2-3, 2-0):
2. Եվրոգավաթներում անցկացրած 26 հանդիպումներում «Բանանցը» 19-րդ պարտությունը կրեց: Մնացած խաղերից 4-ում «Բանանցը» հաղթել է, 3-ն ավարտել է ոչ-ոքի: «Բանանցի» ֆուտբոլիստները խփել են 18 գոլ, սեփական դարպասը բաց են թողել 56 գնդակ:
3. «Սարաևոյից» կրած խոշոր հաշվով պարտությունը 7-րդն էր «Բանանցի» համար եվրոգավաթներում: Մինչ այդ «Բանանցն» այդ կարգի պարտություններ էր կրել ուկրաինական «Դնեպրից» (0-4), շվեյցարական «Յանգ Բոյզից» (0-4), ավստրիական «Զալցբուրգից» (0-7, 0-3), Կիպրոսի «Անորտոսիսից» (0-3) և «Օմոնիայից» (1-4):
4. Եվրոգավաթների մրցաշարերում «Բանանցը» 5-րդ անգամ երկու հանդիպումներում էլ պարտվեց մրցակցին: Նախկինում դա պատահել էր ուկրաինական «Իլիչևեցի» (0-2, 0-2), ավստրիական «Զալցբուրգի» (0-7, 0-3), Կիպրոսի «Անորտոսիսի» (0-3, 0-1) և «Օմոնիայի» (0-1, 1-4) հետ կայացած հանդիպումներում:
5. Եվրոգավաթներում «Բանանցը» 4-րդ անընդմեջ պարտությունը կրեց: Վերջին անգամ «Բանանցը» դրական արդյունքի էր հասել 2014/15թթ. Չեմպիոնների լիգայի մրցաշարում՝ որակավորման առաջին փուլի պատասխան խաղում սեփական հարկի տակ Ժոլտ Հոռնյակի գլխավորությամբ 3-2 հաշվով առավելության հասնելով Անդորրայի «Սանտա Կոլոմայի» նկատմամբ: Սակայն այդ հաղթանակը «Բանանցին» հաջորդ փուլի ուղեգիր չպարգևեց, քանի որ առաջին խաղում մրցակցին զիջել էր 0-1 հաշվով:
