Հայաստանի ներկայացուցիչ Ռաֆայել Հովհաննիսյանը (80 կգ) Թաիլանդի մայրաքաղաք Բանգկոկում ավարտին մոտեցող բռնցքամարտի օլիմպիական վարկանիշային վերջին մրցաշարի կիսաեզրափակիչում պարտվեց:
2022թ. Եվրոպայի փոխչեմպիոնը 0-5 հաշվով զիջեց Դոմինիկյան Հանրապետությունը ներկայացնող Քրիստիան Պինալեսին:
Այնուամենայնիվ, Հովհաննիսյանը դեռ պահպանում է Փարիզ-2024-ի ուղեգիր նվաճելու շանսը: Հայ բռնցքամարտիկը հունիսի 2-ին ուղեգրի համար լրացուցիչ մենամարտում կհանդիպի մյուս կիսաեզրափակիչում պարտված հորդանանցի Հուսեին Իշաիշին:
Հունիսի 2-ին Օլիմպիական խաղերի ուղեգրերի համար կպայքարեն նաև 2022թ. Եվրոպայի չեմպիոն Անի Հովսեփյանը (66 կգ) և 2021թ. աշխարհի փոխչեմպիոն Դավիթ Չալոյանը (+92 կգ):
Հիշեցնենք, որ Հայաստանը բռնցքամարտից դեռևս օլիմպիական ուղեգիր չունի: Փարիզ-2024-ը կանցկացվի հուլիսի 26-ից օգոստոսի 11-ը:
