Իսպանիայի նորընծա չեմպիոն «Բարսելոնան» փորձում է Անսու Ֆատիին պարտադրել հեռանալ ակումբից, հայտնում է Diario Sport-ը:
Կատալոնական ակումբը ստիպված է երկու տրանսֆերային վաճառք ձևակերպել մինչև հունիսի 30-ը՝ ֆինանսական ֆեյր-փլեյի հնարավոր խախտումներից խուսափելու համար:
Ակումբում կարծում են, որ իսպանացի հարձակվողին խանգարում են հաճախ կրկնվող վնասվածքները, ու նա վճռորոշ դեր չունի թիմում: «Բարսելոնան» Ֆատիին հայտնել է, որ գալիք մրցաշրջանում ավելի քիչ խաղաժամանակ կստանա, եթե որոշի մնալ: 20-ամյա խաղացողի գործակալ Ժորժե Մենդեշն իր հաճախորդին խորհուրդ է տալիս փոխել ակումբային գրանցումը, սակայն վերջինս հրաժարվում է հեռանալ «Բարսելոնայից»:
Ավելի վաղ հաղորդվում էր, որ Ֆատին տրանսֆերային փոխանակության արդյունքում կհամալրի անգլիական «Վուլվերհեմփթոնը», իսկ կատալոնական ակումբ կտեղափոխվի պորտուգալացի հենակետային կիսապաշտպան Ռուբեն Նևեշը:
Ընթացիկ մրցաշրջանում Իսպանիայի ազգային հավաքականի ֆուտբոլիստը «Բարսելոնայի» կազմում մասնակցել է 50 խաղի, խփել 9 գոլ, կատարել 4 արդյունավետ փոխանցում: Transfermarkt-ը 35 միլիոն եվրո է գնահատում նրա տրանսֆերային արժեքը:
