«Բետիսը» կբողոքարկի ակումբի վինգեր Անտոնիի կարմիր քարտը, հայտնում է El Chiringuito TV-ն։
Բրազիլացի եզրայինը «Ժիրոնայի» դեմ Իսպանիայի Լա լիգայի 13-րդ տուրի հանդիպմնան (1-1) ավելացված առաջին րոպեին մրցակցի պաշտպան Խոել Ռոկայի գլխին ոտքով հարվածելու համար հեռացվել է դաշտից։
Անդալուզյան ակումբի ներկայացուցիչների կարծիքով՝ մրցավար Իոսու Գալեկ Ապեցտեգիան այդ դրվագում շատ խիստ է պատժել 25-ամյա կիսապաշտպանին։
Ապեցտեգիան սկզբում դեղին քարտ է ցույց տվել Անտոնիին, բայց դրվագի կրկնապատկերը դիտելուց հետո փոխել է որոշումը` հեռացնելով նրան խաղադաշտից։
Եթե բողոքարկումը մերժվի, Անտոնին բաց կթողնի «Սևիլիայի» դեմ Լա լիգայի 14-րդ տուրում կայանալիք անդալուզյան դերբին։
«Սևիլիա» - «Բետիս» հանդիպումը կկայանա նոյեմբերի 30-ին, մեկնարկը` ժամը 19:15-ին։
Լա լիգայի հանդիպումները ցուցադրվում են «Ֆասթ Սպորտ» հեռուստաալիքների («Ֆասթ Սպորտ», «Ֆասթ Սպորտ 1», «Ֆասթ Սպորտ 2») ուղիղ եթերում: Բոլոր խաղերը հեռարձակվում են Fast TV հավելվածում (iOS, Android):
