Տհաճ միջադեպեր են գրանցվել Բրազիլիայի առաջնության «Իպատինգա» - «Ատլետիկո Մինեյրո» խաղում, հայտնում է Globo-ն:
Բարձր ջերմաստիճանի պատճառով երեք երկրպագուի ինքնազգացողություն վատացել է մարզադաշտում: Առաջին խաղակեսում բժիշկները փրկել են 56-ամյա տղամարդու կյանքը. նա հրաժարվել է հիվանդանոց տեղափոխվել:
Առաջին խաղակեսի ընդմիջմանը վատացել է 21-ամյա երկրպագուհու ինքնազգացողությունը. նա արևահարում է ստացել, նաև ակտիվացել է ասթման: Նրան թթվածնային դիմակ են դրել և տեղափոխել հիվանդանոց: Հետագայում իրեն վատ է զգացել 20-ամյա ևս մեկ երկրպագուհի:
Սոցիալական ցանցերում երկրպագուները բողոքել են, որ Իպատինգայի մարզադաշտում հեղուկ գնելու խնդիր է եղել: Այդ օրը ջերմաստիճանը հասել է 28°C-ի և չի նահանջել նույնիսկ գիշերը:
