Ուրուգվայի հավաքականի հարձակվող Էդինսոն Կավանին մոտ է արգենտինական «Բոկա Խունիորս» տեղափոխվելուն, տեղեկացնում է ինսայդեր Ջոնաթան Պինասկոն:
35-ամյա ֆուտբոլիստն ու արգենտինական ակումբը բանակցել են և պայմանավորվել ստորագրել պայմանագիր: Գործարքի մասին պաշտոնապես կհայտարարվի առաջիկա օրերին:
Հիշեցնենք, որ արգենտինական «Բոկա Խունիորսում» է խաղում Հայաստանի հավաքականի հարձակվող Նորբերտո Բրիասկո-Բալեկյանը:
Ավելի վաղ հաղորդվում էր, որ Դորտմունդի «Բորուսիան» նախնական համաձայնության է եկել ուրուգվայցի հարձակվողի հետ, կային տեղեկություններ նաև իսպանական «Վիլյառեալի» հետաքրքրության մասին:
Էդինսոն Կավանին 2020 թվականից խաղում էր անգլիական «Մանչեսթեր Յունայթեդում», որի հետ պայմանագրի ժամկետը սպառվել էր հուլիսի 1-ին:
