Իսպանիայի Լա լիգայում կայացավ 2025 թվականի առաջին խաղը:

12-րդ տուրից հետաձգված մրցավեճում գործող չեմպիոն Մադրիդի «Ռեալը» «Մեստալիայում» դրամատիկ պայքարում 2-1 հաշվով հաղթանակ կորզեց «Վալենսիայից»:

Հաշիվը բացվեց 27-րդ րոպեին, կարիերայում չորրորդ անգամ «Ռեալի» դարպասը գրավեց «Արքայական ակումբի» նախկին հարձակվող Ուգո Դուրոն:

Երկրորդ խաղակեսի մեկնարկից 9 րոպե անց 11-մետրանոց վաստակեց Կիլիան Մբապեն: Նշակետից վրիպեց անգլիացի կիսապաշտպան Ջուդ Բելինգեմը, որը հարվածեց դարպասաձողին: Ընդամենը 6 րոպե անց Բելինգեմը Ստոլե Դիմիտրևսկիի դիմաց մեն-մենակ դուրս բերեց Մբապեին, որը գոլ խփեց, սակայն մրցավարը դարպասի գրավումը չեղարկեց, քանի որ խաղից դուրս վիճակ էր:

79-րդ րոպեին էլ «Ռեալը» մնաց 10 ֆուտբոլիստով, Դիմիտրևսկիին թիկունքից հարվածելու համար կարմիր քարտ ստացավ բրազիլացի վինգեր Վինիսիուս Ժունիորը:

Այնուամենայնիվ, 85-րդ րոպեին փոխարինման դուրս եկած լեգենդար խորվաթ կիսապաշտպան Լուկա Մոդրիչը հավասարեցրեց խաղի հաշիվը: 39-ամյա կիսապաշտպանն Իսպանիայի ընթացիկ առաջնությունում առաջին գոլը խփեց: Նա 13 մրցաշրջան անընդմեջ գոլ է խփում Լա լիգայում:

Ավելացված ժամանակի 5-րդ րոպեին էլ «Ռեալի» համար հաղթանակ կորզեց Բելինգեմը, որը «Վալենսիայի» պաշտպանների կոպիտ սխալներից հետո մեն-մենակ դուրս եկավ Դիմիտրևսկիի դիմաց և խոցեց մրցակցի դարպասը:

Կառլո Անչելոտիի գլխավորած թիմը 19 հանդիպումից հետո 43 միավորով գլխավորեց մրցաշարային աղյուսակը: Երկրորդ տեղում գտնվում է Մադրիդի «Աթլետիկոն», որը մեկ խաղ քիչ է անցկացրել, երկու միավորով է զիջում նոր առաջատարին, «Վալենսիան» 18 խաղից հետո 12 միավորով 19-րդն է:

Իսպանիայի Լա լիգա, 12-րդ տուր

«Վալենսիա» - «Ռեալ»` 1-2 

Ուգո Դուրո, 27 - Լուկա Մոդրիչ, 85, Ջուդ Բելինգեմ, 90+5

Հեռացում` Վինիսիուս Ժունիոր, 79 («Ռեալ»)

Չիրացրած 11-մետրանոց` Ջուդ Բելինգեմ, 55 («Ռեալ»)