Logo

Կոնֆերենցիաների լիգա. «Փյունիկը» պարտությամբ մեկնարկեց խմբային փուլում (տեսանյութ)

Հեղինակ
Ալբերտ Շահինյան
00:53 / 09.09.2022• Հայկական ֆուտբոլ
null

Կոնֆերենցիաների լիգայի խմբային փուլի առաջին տուրում VBET Հայաստանի Պրեմիեր լիգայի չեմպիոն Երևանի «Փյունիկը» հյուրընկալվելիս 1-3 հաշվով պարտվեց շվեյցարական «Բազելին»:  

23-րդ րոպեին հստակ իրացնելով 11-մետրանոց հարվածը՝ հաշիվը բացեց տանտերերի շվեյցարացի հարձակվող Դարիան Մալեսը: 4 րոպե անց հավասարակշռությունը վերականգնեց երևանյան ակումբի կիսապաշտպան Արտակ Դաշյանը: Աչքի ընկնելով 54-րդ ու 76-րդ րոպեներին՝ վերջնական հաշիվը ձևակերպեց «Բազելի» նիդեռլանդցի կիսապաշտպան Վաուտեր Բուրգերը:

Վիճակագրություն.

  • Գնդակին տիրելու տոկոսային հարաբերություն՝ 64%-36%
  • Հարվածներ դարպասի ուղղությամբ՝ 15-7
  • Հարվածներ դարպասին՝ 4-2
  • Անկյունայիններ՝ 4-3
  • Խաղից դուրս վիճակ՝ 1-4
  • Սեյվեր՝ 1-1
  • Խախտումներ՝ 16-3
  • Դեղին քարտեր՝ 1-3
  • Կարմիր քարտեր՝ 0-0

«Բազելը» 3 միավորով H խմբի առաջատարն է, «Փյունիկն» առանց միավորի 4-րդն է:

«Փյունիկի» և «Բազելի» հետ H խմբում ընդգրկված են նաև լիտվական «Ժալգիրիսն» ու Բրատիսլավիայի «Սլովանը», որի կազմում ելույթ է ունենում Հայաստանի հավաքականի վինգեր Տիգրան Բարսեղյանը: 

2-րդ տուրում Հայաստանի չեմպիոնն ընդունելու է Սլովակիայի չեմպիոն «Սլովանին: Հանդիպումը կայանալու է սեպտեմբերի 15-ին «Հանրապետական» մարզադաշտում: Մեկնարկը՝ Երևանի ժամանակով 20:45-ին:

Հիշեցնենք, որ Եղիշե Մելիքյանի գլխավորած թիմը եվրագավաթներում պայքարը սկսել էր Չեմպիոնների լիգայի որակավորման առաջին փուլից, որտեղ երկխաղյա դիմակայության արդյունքում հաղթահարել էր Ռումինիայի չեմպիոն «Կլուժի» արգելքը (0-0, 2-2, 11-մետրանոցներ՝ 4-3)։ Երկրորդ փուլում Եղիշե Մելիքյանի գլխավորած թիմը պայքարից դուրս էր թողել Լյուքսեմբուրգի չեմպիոն «Դյուդելանժին» (0-1, 4-1)` դառնալով Չեմպիոնների լիգայի որակավորման երրորդ փուլ դուրս եկած առաջին հայկական ակումբը: Երրորդ փուլում Հայաստանի 15-ակի չեմպիոնը պարտվել էր սերբական «Ցրվենա Զվեզեդային» (0-5, 0-2) և տեղափոխվել Եվրոպա լիգա, որի որակավորման փլեյ-օֆֆ փուլում հետխաղյա 11-մետրանոցներով 2-3 հաշվով զիջել էր մոլդովական «Շերիֆին» (0-0, 0-0):

Կոնֆերենցիաների լիգայի գործող հաղթողը Հռոմի «Ռոման» է:

Կոնֆերենցիաների լիգա, 1-տուր

«Բազել» (Շվեյցարիա) - «Փյունիկ» (Երևան)՝ 3-1

Դարիան Մալես, 23, (11-մետրանոց), Վաուտեր Բյուրգեր, 54, 76 -  Արտակ Դաշյան, 27

Մեզ կարող եք հետևել նաև Telegram-ում
fastnews-ads-banner

Հարցում

TV Ալիք

    Աղյուսակներ