«Փյունիկի» կիսապաշտպան Էդգար Մալաքյանը ֆուտբոլային կարիերայում նշանակալի նվաճման հասավ: Առաջնության 10-րդ տուրում Չարենցավանում «Վանի» հետ կայացած հանդիպումը պաշտոնական մրցումներում Մալաքյանի անցկացրած հոբելյանական՝ 500-րդ խաղն էր: Նա դարձավ այդ սահմանագիծը հատած ընդամենը 17-րդ ֆուտբոլիստը: Այդ փաստն արդեն վկայում է, թե որքան դժվար է նման ցուցանիշի հասնելը:

500 խաղերից  298-ը Մալաքյանն անցկացրել է ՀՀ առաջնությունների Բարձրագույն խմբում (Ա), 35-ը՝ Հայաստանի գավաթի (Գ), 2-ը՝ Սուպերգավաթի (Ս), 24-ը՝ եվրոպական գավաթների (Ե) մրցաշարերում, 21-ը՝ ՀՀ ազգային հավաքականում (ԱՀ), 14-ը՝ երիտասարդական հավաքականում (ԵՀ), 106-ը՝ արտերկրի Բարձրագույն խմբի առաջնությունների մասնակից թիմերում (ԱԵ):

35-ամյա Մալաքյանն արդեն 19 տարի պրոֆեսիոնալ ֆուտբոլում է: Նա 16-րդ մրցաշրջանն է անցկացնում Fastex Պրեմիեր լիգայում՝ այդ ընթացքում կրելով Բարձրագույն խմբի 5 թիմերի մարզաշապիկները:

Էդգար Մալաքյանը «Փյունիկի» ֆուտբոլի մարզադպրոցի սան է, որի կազմում նորամուտը նշել է 2007թ. նոյեմբերի 10-ին Գյումրիում «Շիրակի» հետ կայացած առաջնության ավարտական տուրի խաղում: Նախորդ տուրում «Փյունիկը» 7-րդ տարին անընդմեջ պաշտոնապես գրանցել էր հերթական չեմպիոնությունը, ուստի Արմեն Գյուլբուդաղյանցը շիրակցիների դեմ խաղում խաղադաշտ էր դուրս բերել հիմնականում պատանի ֆուտբոլիստների: Նրանց թվում էր և 18-ամյա Էդգարը, որը 77-րդ րոպեին փոխարինել էր Արտակ Խաչատրյանին:

Հաջորդ մրցաշրջանում Մալաքյանն իր ցուցադրած խաղի շնորհիվ արժանացավ մարզիչների վստահությանը ու դարձավ թիմի հիմնական ֆուտբոլիստներից մեկը՝ մասնակցելով առաջնության 29 հանդիպումներից 28-ին, խփելով 2 գոլ: Գոլերի հաշիվը Մալաքյանը բացեց 2008թ. օգոստոսի 9-ին՝ «Բանանցի» հետ խաղում դառնալով դուբլի հեղինակ: Այդ մրցաշրջանում Մալաքյանն իր առաջին ոսկե մեդալը ստացավ:

Մինչև 2012թ. մայիս «Փյունիկում» խաղալիս Մալաքյանը թիմի կազմում դարձավ Հայաստանի եռակի չեմպիոն, կրկնակի գավաթակիր, մեկ անգամ էլ արժանացավ սուպերգավաթակրի տիտղոսին և արծաթե մեդալի:

Կարճ ժամանակահատված անցկացնելով չեխական «Վիկտորիա Պլզեն» և «Չեսկե Բուդյովիցե» թիմերում, Մալաքյանը 2013/14թթ. մրցաշրջանը դիմավորեց «Բանանցում», որի կազմում մասնակցելով առաջնության աշնանային հատվածին, կրկին մեկնեց Չեխիա: Հետագայում նա կես մրցաշրջան խաղաց «Ալաշկերտում» (2014/15թթ.), ապա տեղափոխվեց «Շիրակ» (2014/15-2015/16թթ.), որի կազմում մեկական արծաթե և բրոնզե մեդալի արժանացավ: Հետո Մալաքյանը կրկին մեկնեց արտերկիր: էդգարը նախ խաղաց Ուկրաինայի առաջնությունում՝ հանդես գալով Դնեպրոձերժինսկի և Կամյանսկի համանուն «Ստալում», ապա տեղափոխվեց ղազախական «Ժետիսու», կարճ ժամանակաշրջան էլ անցկացրեց ռումինական «Պետրոլուլում»:

2019թ. ամռանը Մալաքյանը վերադարձավ «Շիրակ», որի կազմում մասնակցեց 2019/20թթ. առաջնությանը: Հաջորդ մրցաշրջանում փորձառու ֆուտբոլիստը շիրակցի իր մի խումբ խաղընկերների հետ տեղափոխվեց «Արարատ», որի կազմում 3-րդ անգամ վայելեց Հայաստանի գավաթը նվաճելու բերկրանքը:

2023թ. հունվարին Էդգար Մալաքյանը 11 տարվա ընդմիջումից հետո վերադարձավ «Փյունիկ»՝ կրկին կրելով հարազատ ակումբի մարզաշապիկը: Վերադարձը նշանավորվեց արծաթե մեդալի նվաճմամբ 2023/24թթ. առաջնությունը հաջող էր «Փյունիկի» համար, որը 16-րդ անգամ չեմպիոն հռչակվեց, իսկ Մալաքյանը իր 4-րդ ոսկե մեդալը նվաճեց:

FastNews-ը ներկայացնում է ֆուտբոլային կարիերայում 500 և ավելի խաղ անցկացրած հայ ֆուտբոլիստների ցուցանիշները: 

 

Ֆուտբոլիստ	Ա	Գ	Ս	Ե	ԱՀ	ԵՀ	ԱՊՀ	ԱԵ	ԸՆԴ
1.Հենրի          1.Հենրիխ Մխիթարյան	70	16	1	6	95	14	-	684	886
2.Սարգ          2.Սարգիս Հովսեփյան	365	66	3	26	132	-	13	178	783
3.Հրայր          3.Հրայր Մկոյան	388	50	2	23	52	7	7	85	614
4.Կամո         4.Կամո Հովհաննիսյան	216	36	4	22	92	10	-	213	593
5.Հովհ         5.Հովհաննես Թահմազյան	461	83	6	20	6	-	6	-	582
6.Արտ           6.Արտակ Գրիգորյան	404	45	5	53	51	-	3	-	561
7.Համլ           7.Համլետ Մխիթարյան	192	44	2	18	56	-	7	231	550
8.Արթո          8.Արթուր Քոչարյան	357	68	1	11	4	10	2	82	535
9.Կարե         9.Կարեն Ալեքսանյան	324	52	4	21	25	15	10	80	531
10.Գևո          10.Գևորգ Կասպարով	348	56	5	21	29	2	10	59	530
11.Գևո           11.Գևորգ Ղազարյան	170	26	3	10	75	18	3	219	524
12.Հով   12.Հովհաննես Համբարձումյան	183	25	1	17	53	10	-	233	522
13.Ար            13.Արտակ Եդիգարյան	347	48	6	38	32	13	-	35	519
14.Վար        14.Վարազդատ Հարոյան	156	24	1	13	92	14	-	217	517
15.Տիգր         15.Տիգրան Դավթյան	409	62	3	31	1	1	-	-	507
16.Արթ          16.Արթուր Ոսկանյան	254	43	3	16	54	1	6	123	500
17. Էդգ           17. Էդգար Մալաքյան	298	35	2	24	21	14	-	106	500