«Փյունիկի» կիսապաշտպան Էդգար Մալաքյանը ֆուտբոլային կարիերայում ևս մեկ նշանակալի նվաճման հասավ:

«Արարատ-Արմենիայի» հետ առաջնության 3-րդ տուրից հետաձգված խաղում Մալաքյանը Fastex Պրեմիեր լիգայում 300-րդ անգամ խաղադաշտ դուրս եկավ: «Փյունիկի» 35-ամյա ավագը դարձավ այդ սահմանագիծը հատած ընդամենը 20-րդ ֆուտբոլիստը ՀՀ առաջնությունների անցկացման 33-ամյա պատմության մեջ:

Հիշեցնենք, որ հոկտեմբերի 18-ին Չարենցավանում «Վանի» հետ կայացած առաջնության մրցավեճում Մալաքյանը պաշտոնական մրցումներում 500-րդ խաղի հոբելյանն էր նշել:

Էդգար Մալաքյանն արդեն 19 տարի պրոֆեսիոնալ ֆուտբոլում է: Նա 16-րդ մրցաշրջանն է անցկացնում Fastex Պրեմիեր լիգայում՝ այդ ընթացքում կրելով Բարձրագույն խմբի 5 թիմերի մարզաշապիկները:

Էդգար Մալաքյանը «Փյունիկի» ֆուտբոլի մարզադպրոցի սան է, որի կազմում նորամուտը նշել է 2007թ. նոյեմբերի 10-ին Գյումրիում «Շիրակի» հետ կայացած առաջնության ավարտական տուրի խաղում: Նախորդ տուրում «Փյունիկը» 7-րդ տարին անընդմեջ պաշտոնապես գրանցել էր հերթական չեմպիոնությունը, ուստի Արմեն Գյուլբուդաղյանցը շիրակցիների դեմ խաղում խաղադաշտ էր դուրս բերել հիմնականում պատանի ֆուտբոլիստների: Նրանց թվում էր և 18-ամյա Էդգարը, որը 77-րդ րոպեին փոխարինել էր Արտակ Խաչատրյանին:

Հաջորդ մրցաշրջանում Մալաքյանն իր ցուցադրած խաղի շնորհիվ արժանացավ մարզիչների վստահությանը ու դարձավ թիմի հիմնական ֆուտբոլիստներից մեկը՝ մասնակցելով առաջնության 29 հանդիպումներից 28-ին, խփելով 2 գոլ: Գոլերի հաշիվը Մալաքյանը բացեց 2008թ. օգոստոսի 9-ին՝ «Բանանցի» հետ խաղում դառնալով դուբլի հեղինակ: Այդ մրցաշրջանում Մալաքյանն իր առաջին ոսկե մեդալը ստացավ:

Մինչև 2012թ. մայիս «Փյունիկում» խաղալիս Մալաքյանը թիմի կազմում դարձավ Հայաստանի եռակի չեմպիոն, կրկնակի գավաթակիր, մեկ անգամ էլ արժանացավ սուպերգավաթակրի տիտղոսին և արծաթե մեդալի:

Կարճ ժամանակահատված անցկացնելով չեխական «Վիկտորիա Պլզեն» և «Չեսկե Բուդյովիցե» թիմերում, Մալաքյանը 2013/14թթ. մրցաշրջանը դիմավորեց «Բանանցում», որի կազմում մասնակցելով առաջնության աշնանային հատվածին, կրկին մեկնեց Չեխիա: Հետագայում նա կես մրցաշրջան խաղաց «Ալաշկերտում» (2014/15թթ.), ապա տեղափոխվեց «Շիրակ» (2014/15-2015/16թթ.), որի կազմում մեկական արծաթե և բրոնզե մեդալի արժանացավ: Հետո Մալաքյանը կրկին մեկնեց արտերկիր: էդգարը նախ խաղաց Ուկրաինայի առաջնությունում՝ հանդես գալով Դնեպրոձերժինսկի և Կամյանսկի համանուն «Ստալում», ապա տեղափոխվեց ղազախական «Ժետիսու», կարճ ժամանակաշրջան էլ անցկացրեց ռումինական «Պետրոլուլում»:

2019թ. ամռանը Մալաքյանը վերադարձավ «Շիրակ», որի կազմում մասնակցեց 2019/20թթ. առաջնությանը: Հաջորդ մրցաշրջանում փորձառու ֆուտբոլիստը շիրակցի իր մի խումբ խաղընկերների հետ տեղափոխվեց «Արարատ», որի կազմում 3-րդ անգամ վայելեց Հայաստանի գավաթը նվաճելու բերկրանքը:

2023թ. հունվարին Էդգար Մալաքյանը 11 տարվա ընդմիջումից հետո վերադարձավ «Փյունիկ»՝ կրկին կրելով հարազատ ակումբի մարզաշապիկը: Վերադարձը նշանավորվեց արծաթե մեդալի նվաճմամբ: 2023/24թթ. առաջնությունը հաջող էր «Փյունիկի» համար, որը 16-րդ անգամ չեմպիոն հռչակվեց, իսկ Մալաքյանը իր 4-րդ ոսկե մեդալը նվաճեց:

FastNews-ը ներկայացնում է Fastex Պրեմիեր լիգայում 300 և ավելի խաղ անցկացրած ֆուտբոլիստների ցուցանիշները:

Ֆուտբոլիստներ	Խաղ
1. Հովհաննես Թահմազյան	461
2. Տիգրան Դավթյան	409
3. Արտակ Գրիգորյան	404
4. Հրայր Մկոյան	392
5. Սարգիս Հովսեփյան	365
6. Արթուր Քոչարյան	357
7. Գևորգ Կասպարով	348
8. Արտակ Եդիգարյան	347
9. Արարատ Հարությունյան	336
10. Կարեն Մուրադյան	330
11. Արսեն Ավետիսյան	329
12. Կարեն Ալեքսանյան	324
13. Տարոն Ոսկանյան	322
14. Արտյոմ Ադամյան	320
15. Նորայր Գրիգորյան	319
16. Կարեն Սիմոնյան	314
17. Տիգրան Հովհաննիսյան	305
18. Արամ Բարեղամյան	304
19. Գագիկ Դաղբաշյան	301
20. Էդգար Մալաքյան	300