Երևանում երկրորդ անգամ անցկացվող Ֆլեյտայի միջազգային փառատոնը հոկտեմբերի 26-31-ը կհամախմբի ֆլեյտահարներին, դասախոսներին, ուսանողներին և արվեստասեր հյուրերին՝ 13 երկրի 21 քաղաքից։ Այս օրերի ընթացքում նախատեսվում է շուրջ հարյուր վարպետության դաս, դասախոսություն, ստեղծագործական հանդիպում, ինչպես նաև երեք մեծ համերգ։
Բացման համերգը կկայանա հոկտեմբերի 27-ին՝ «Արամ Խաչատրյան» համերգասրահում։ Երեկոյին հանդես կգան աշխարհահռչակ ֆլեյտահարներ՝ Հայաստանի ազգային ֆիլհարմոնիկ նվագախմբի մասնակցությամբ, իսկ նվագախումբը կղեկավարի դիրիժոր Էդուարդ Թոփչյանը։
Մյուս երկու համերգները նախատեսված են հոկտեմբերի 28-ին և 29-ին՝ «Առնո Բաբաջանյան» համերգասրահում: Այդ համերգային երեկոներին մենակատարները ելույթ կունենան KV Art անսամբլի նվագակցությամբ՝ Նարեկ Ավագյանի ղեկավարությամբ։
«Ֆլեյտային կամուրջներ» նախագծի ղեկավար Վարդան Վիրաբյանը, խոստովանում է, որ դեռ երեք տարի առաջ խոստացել էր Հայաստանում ավելի ակտիվորեն զարգացնել և զարգացնել ֆլեյտայի արվեստը։ Այդ ժամանակից ի վեր իրականացվել են վարպետության դասեր ու համերգներ՝ Հայաստանի, Ռուսաստանի և Բելառուսի երաժիշտների ու ուսանողների մասնակցությամբ։
Հայաստանի ազգային ֆիլհարմոնիկ նվագախմբի գլխավոր պրոդյուսեր Արման Պադարյանը վստահեցնում է, որ Ֆլեյտայի արվեստը Հայաստանում աննախադեպ աճ է գրանցում.
«Չկա լավ ֆլեյտահար առանց լավ գործիքի, առանց լավ դասախոսի, ուստի անհրաժեշտ է անել հնարավորը, որ երկրում գնալով շատանան երիտասարդ և կիրթ ֆլեյտահարները»:
Ֆլեյտայի միջազգային փառատոնը նպատակ ունի խթանել և զարգացնել ֆլեյտայի արվեստը Հայաստանում՝ ձևավորելով մասնագիտական միջավայր, որտեղ հնարավոր կլինի իրականացնել փորձի և գաղափարների փոխանակում տեղացի և արտասահմանյան առաջատար ֆլեյտահարների միջև։ Ֆլեյտայի Երևանի միջազգային փառատոնն առանձնանում է իր լայնածավալ ձևաչափով և աշխարհահռչակ մենակատարների մասնակցությամբ՝ դառնալով բացառիկ իրադարձություն ոչ միայն Հայաստանում, այլև տարածաշրջանում։
