FastNews-ը նախորդ հրապարակման մեջ ներկայացրել էր Եվրագավաթներում հայկական ակումբներում հանդես եկած լավագույն ռմբարկուների ցուցանիշները: Այսօր կանդրադառնանք այն ֆուտբոլիստներին, որոնք եվրոպական գավաթների մրցաշարերում առավել շատ խաղերի են մասնակցել:

Եվրագավաթներում հայկական ակումբներում անցկացրած խաղերի ընդհանուր քանակով յուրօրինակ ռեկորդակիրը ձմռանը ֆուտբոլային կարիերան ավարտած Արտակ Գրիգորյանն է: Փորձառու ֆուտբոլիստը հայկական 4 թիմերի կազմում Եվրագավաթներում ընդհանուր առմամբ 53 խաղ է անցկացրել:

Արտակ Գրիգորյանը ռեկորդակրի տիտղոսին արժանացել է 2021թ. հուլիսի 28-ին մոլդովական «Շերիֆի» հետ Չեմպիոնների լիգայի որակավորման 2-րդ փուլի պատասխան հանդիպման ժամանակ: Այդ օրն «Ալաշկերտի» ավագը Եվրագավաթների մրցաշարերում 33-րդ անգամ խաղադաշտ դուրս եկավ ու գերազանցեց Աղվան Մկրտչյանի ռեկորդային ցուցանիշը, որը հայկական ակումբների ֆուտբոլիստներից եվրոպական գավաթների մրցաշարերում բոլորից շատ՝ 32 խաղ էր անցկացրել: Իր վերջին խաղը Եվրագավաթներում Աղվանն անցկացրել էր 2013թ. հուլիսի 9-ին՝ «Միկայի» կազմում մասնակցելով Չեռնոգորիայի «Ռուդարի» հետ Երևանում կայացած Եվրոպա լիգայի որակավորման առաջին փուլի հանդիպմանը:

Եվրագավաթների մրցաշարերում Արտակ Գրիգորյանի նորամուտը կայացել է 2010թ. հուլիսի 1-ին «Հրազդան» մարզադաշտում կայացած «Ուլիս»-«Բնեյ Եհուդա» Եվրոպա լիգայի որակավորման առաջին փուլի խաղում, որում գրանցվել էր գոլազուրկ ոչ-ոքի: Պատասխան խաղում «Ուլիսը» նվազագույն հաշվով պարտվեց ու դուրս մնաց մրցաշարից:

Հաջորդ երկու մրցաշրջաններում Գրիգորյանն «Ուլիսի» կազմում եվրագավաթներում 2-ական խաղ անցկացրեց, իսկ 2013/14թթ. Եվրոպա լիգայի խաղարկությունում «Գանձասարի» կազմում մասնակցեց ղազախական «Ակտոբեի» հետ կայացած երկու հանդիպումներին:

Եվրագավաթների մրցաշարերում հաջորդ 36 հանդիպումներն Արտակ Գրիգորյանն անցկացրել է «Ալաշկերտում»՝ այդ ցուցանիշով հանդիսանալով թիմի ռեկորդակիրը: «Ալաշկերտի» կազմում Եվրագավաթներում առաջին խաղն Արտակն անցկացրել է 2015թ. հուլիսի 2-ին Երևանում շոտլանդական «Սենթ Ջոնսթոնի» հետ կայացած Եվրոպա լիգայի որակավորման առաջին փուլի մրցավեճում: 2023թ. ամռանը տեղափոխվելով «Փյունիկ», Գրիգորյանը 2 մրցաշրջանում թիմի կազմում եվրոպական գավաթների մրցաշարերում 9 խաղի մասնակցեց:

Եվրագավաթների նոր մրցաշրջանում Արտակ Գրիգորյանի ռեկորդային ցուցանիշը գերազանցելու լավ հնարավորություն ունի «Նոայի» կիսապաշտպան Արտակ Դաշյանը, որը 46 խաղ է անցկացրել: Նախորդ մրցաշրջանում «Նոայում» նորամուտը նշած Դաշյանը թիմի կազմում մասնակցել էր եվրագավաթային 7 հանդիպման: Նա ռեկորդակիր է Կոնֆերենցիաների լիգայի մրցաշարում անցկացրած խաղերի ընդհանուր քանակով (27):

35-ամյա Դաշյանը զգալի փորձ ունի նաև Չեմպիոնների լիգայի մրցաշարում, որում ընդհանուր առմամբ 11 խաղ է անցկացրել: Այդ ցուցանիշով նա ռեկորդակիր է «Նոայի» ֆուտբոլիստների մեջ, որոնցից շատերը թիմի կազմում իրենց նորամուտն են նշելու եվրռպական ակումբային ամենահեղինակավոր մրցաշարում:

Իսկ իր առաջին խաղը Եվրագավաթներում Դաշյանն անցկացրել է 2009թ. հուլիսի 2-ին բոսնիական «Շիրոկի Բրիեգի» հետ Երևանում կայացած Եվրոպա լիգայի մրցախաղում: Մեկ շաբաթ անց կայացած պատասխան խաղում նա բացեց գոլերի հաշիվը Եվրագավաթներում՝ դառնալով թիմի կազմում գոլ խփած ամենաերիտասարդ ֆուտբոլիստը՝ 19 տարեկան 231 օրական: Այդ ցուցանիշը մինչ օրս չի գերազանցվել:

Եվրագավաթներում առավել շատ խաղերի մասնակցած ֆուտբոլիստների հնգյակը եզրափակում է Օգնյեն Չանչարևիչը: «Նոայի» և Հայաստանի ազգային հավաքականի դարպասապահը 37 խաղ է անցկացրել ու այդ ցուցանիշով ռեկորդակիր է այլազգի ֆուտբոլիստների մեջ:

Նա նաև հայկական ակումբներում հանդես եկած դարպասապահներից միակն է, որ գոլի հեղինակ է դարձել Եվրագավաթներում՝ գրավելով հունական ԱԵԿ-ի դարպասը:

FastNews-ը ներկայացնում է Եվրագավաթներում առավել շատ հանդիպումներ անցկացրած ֆուտբոլիստների ցանկը՝ նշելով տարբեր մրցաշարերում խաղերի քանակը:

Ֆուտբոլիստներ	ՉԼ	ԵԼ	ԳԳ	ԻԳ	ԿԼ	ԸՆԴ
1.Արտակ Գրիգորյան	14	23	-	-	16	53
2. Արտակ Դաշյան	11	8	-	-	27	46
3. Տարոն Ոսկանյան	11	21	-	-	12	44
4. Արտակ Եդիգարյան	18	11	-	-	9	38
5. Օգնյեն Չանչարևիչ	4	13	-	-	20	37
6. Աղվան Մկրտչյան	20	12	-	-	-	32
7. Տիգրան Դավթյան	5	22	-	4	-	31
8. Յուսուֆ Օտուբանջո	9	5	-	-	17	31
9. Կարեն Մուրադյան	8	10	-	-	12	30
10. Խամես Սանթոս	6	4	-	-	19	29
11. Ռաֆայել Նազարյան	17	2	5	3	-	27
12. Դիդիե Բորիս Կադիո	8	12	-	-	7	27
13. Հովհաննես Հարությունյան	6	6	-	-	15	27
14. Ժունինյու	8	2	-	-	17	27
15. Ռումյան Հովսեփյան	9	11	-	-	6	26
16. Սարգիս Հովսեփյան	22	4	-	-	-	26
17. Արթուր Յուզբաշյան	12	13	-	-	-	25
18 Միխայիլ Կովալենկո	7	3	-	-	15	25
19. Հրայր Մկոյան	-	15	-	2	6	23
20. Էդգար Մալաքյան	5	5	-	-	13	23
21. Դավիդ Դավիդյան	11	-	-	-	12	23