Ավստրիայի հավաքականը Եվրո-2024-ի խմբային փուլի երկրորդ տուրում 3-1 հաշվով հաղթեց Լեհաստանի ազգային թիմին:

Ավստրիացիների կազմում 9-րդ րոպեին հաշիվը բացեց Ռոտերդամի «Ֆեյենորդի» պաշտպան Գերնոտ Թրաուները, որը գլխի հարվածով գրավեց Վոյցեխ Շչեսնիի դարպասը:

Լեհերը 21 րոպե անց թուրքական «Ինստանբուլ Բաշաքշեհիրի» հարձակվող Քշիշտոֆ Պիոնտեկի դիպուկ հարվածի շնորհիվ հավասարեցրին խաղի հաշիվը: Թիմերն ընդմիջման գնացին հավասար հաշվի պայմաններում։

60-րդ րոպեին փոխարինման մտավ Լեհաստանի հավաքականի առաջատար Ռոբերտ Լևանդովսկին, որը վնասվածքի պատճառով բաց էր թողել նախորդ հանդիպումը։ Այնուամենայնիվ, կատալոնական «Բարսելոնայի» հարձակվողը ևս չօգնեց լեհերին։

Ավստրիայի հավաքականը կրկին հաշվի մեջ առաջ անցավ 66-րդ րոպեին, գոլի հեղինակ դարձավ գերմանական «Լայպցիգի» կիսապաշտպան Քրիստոֆ Բաումգարտները:

24-ամյա Բաումգարտները 11 րոպե անց էլ մեն-մենակ դուրս եկավ Վոյցեխ Շչեսնիի դեմ, և Թուրինի «Յուվենտուսի» լեհ դարպասապահ ստիպված խախտեց կանոնները։ Նշանակվեց 11-մետրանոց հարված, որը դիպուկ իրացրեց Ավստրիայի հավաքականի ավագ, իտալական «Ինտերի» հարձակվող Մարկո Արնաուտովիչը:

Գերմանացի մասնագետ Ռալֆ Ռանգնիկի գլխավորած թիմն այս հաղթանակից հետո 3 միավորով D խմբում հավասարվեց աշխարհի փոխչեմպիոն Ֆրանսիային և Նիդերլանդներին, որոնք դեռ չեն անցկացրել երկրորդ տուրի հանդիպումը։ Լեհաստանի հավաքականը միավոր չունի:

Հիշեցնենք, որ առաջին տուրում Լեհաստանը 1-2 հաշվով զիջել էր Նիդերլանդներին, Ավստրիան 0-1 հաշվով պարտվել էր Ֆրանսիային:

Երևանի ժամանակով 23:00-ից այս խմբի մյուս խաղում կմրցեն Ֆրանսիայի և Նիդերլանդների հավաքականները:

Եվրո-2024, խմբային փուլ, երկրորդ տուր

D խումբ

Լեհաստան - Ավստրիա՝ 1-3 (տեսանյութ)

Քշիշտոֆ Պիոնտեկ, 30 - Գերնոտ Թրաուներ, 9, Քրիստոֆ Բաումգարտներ, 66, Մարկո Արնաուտովիչ, 78 (11մ)