Եվրո-2024-ի D խմբի երկրորդ տուրի կենտրոնական խաղում Ֆրանսիայի և Նիդերլանդների ազգային հավաքականները բաժանվեցին գոլազուրկ ոչ-ոքիով՝ 0-0:

Ֆրանսիացիների կազմում հանդիպման մեկնարկում գոլ խփելու երեք լավ հնարավորություններ ունեցավ Մադրիդի «Աթլետիկոյի» հարձակվող Անտուան Գրիզմանը: 33-ամյա ֆուտբոլիստը մեկ անգամ հեռվից հարվածեց, ինչից հետո գնդակը մեծ դժվարությամբ հեռացրեց անգլիական «Բրայթոնի» և Նիդերլանդների հավաքականի դարպասապահ Բարտ Վերբրյուգենը:

Գրիզմանը մեկ անգամ էլ մոտ տարածությունից շեղ հարվածից, իսկ մյուս դեպքում ֆրանսիացին գնդակը ստացավ դարպասային հրապարակում, սակայն ուշացրեց հարվածը և նիդերլանդցի պաշտպանները հեռացրին այն:

Գրիզմանը մեկ լավ հնարավորություն էլ ունեցավ երկրորդ խաղակեսի միջնամասում, երբ Սաուդյան Արաբիան ներկայացնող «Ալ Իթիհադի» կիսապաշտպան Նգոլո Կանտեի հիանալի փոխանցումից հետո դուրս եկավ Վերբրյուգենի դիմաց, այս դեպքում էլ ֆրանսիացու հարվածից հետո 21-ամյա դարպասապահը ոտքով հեռացրեց գնդակը:

69-րդ րոպեին Նիդերլանդների հավաքականը գրավեց դարպասը, սակայն անգլիացի մրցավար Էնթոնի Թեյլորը չեղարկեց գերմանական «Լայպցիգի» կիսապաշտպան Խավի Սիմոնսի գոլը, քանի որ նրա հարվածի ժամանակ խաղից դուրս վիճակում գտնվող Դենզել Դյումֆրիսը ֆրանսիացիների դարպասապահ Մայք Մենյանի հարևանությամբ էր:

Այս ոչ-ոքիից հետո Դիդյե Դեշամի և Ռոնալդ Կումանի գլխավորած հավաքականները չորսական միավորով D խմբում բաժանում են 1-2-րդ տեղերը:

Ժամեր առաջ Լեհաստանի հավաքականին 3-1 հաշվով հաղթած ավստրիացիները երեք միավորով երրորդն են: Լեհերը միավոր չունեն և դարձան Եվրո-2024-ի առաջին հավաքականը, որը խմբային փուլի երրորդ տուրից առաջ զրկվեց փլեյ-օֆֆ դուրս գալու բոլոր հնարավորություններից: Նույնիսկ վերջին տուրում հաղթելու դեպքում Լեհաստանի հավաքականը չի կարող չորրորդ տեղից բարձրանալ: 

Հիշեցնենք, որ 6 խմբերում երրորդ տեղը գրավածներից լավագույն արդյունքոց չորս հավաքականները ևս պայքարը կշարունակեն փլեյ-օֆֆում:

Աշխարհի փոխչեմպիոն Ֆրանսիան խմբային փուլը կավարտի Լեհաստանի հավաքականի դեմ խաղով, իսկ Նիդերլանդները կհանդիպի Ավստրիային: Երկու խաղերն էլ կկայանան հունիսի 25-ին և կմեկնարկեն Երևանի ժամանակով 20:00-ին:

Եվրո-2024, խմբային փուլ, երկրորդ տուր

D խումբ

Նիդերլանդներ - Ֆրանսիա՝ 0-0 (տեսանյութ)