Իտալիայի ազգային հավաքականը հաղթանակով սկսեց պայքարը Գերմանիայում ընթացող ֆուտբոլի Եվրոպայի առաջնությունում:

Եվրոպայի գործող չեմպիոնը B խմբի առաջին տուրում մրցեց Ալբանիայի հավաքականի դեմ և 2-1 հաշվով կամային հաղթանակի հասավ, Դորտմունդում կայացած հանդիպման բոլոր գոլերը գրանցվեցին առաջին խաղակեսի առաջին հատվածում:

Հանդիպման հաշիվը բացվեց 22-րդ վայրկյանին, Ալբանիայի հավաքականի կիսապաշտպան Նեդիմ Բայրամին խփեց Եվրոպայի առաջնությունների պատմության ամենաարագ գոլը:

Իտալական «Սասուոլոյի» ֆուտբոլիստն օգտվեց Ա սերիայի չեմպիոն «Ինտերի» պաշտպան Ֆեդերիկո Դիմարկոյի սխալ եզրային նետումից և ստանալով գնդակը մրցակցի տուգանային հրապարակում հուժկու հարվածով գրավեց Ջանլուիջի Դոնարումայի դարպասը:

Չնայած բաց թողած արագ գոլին, Լուչիանո Սպալետիի գլխավորած հավաքականը 11-րդ րոպեին կարողացավ հավասարեցնել հանդիպման հաշիվը: Պատասխան գոլը գլխի հարվածոով խփեց «Ինտերի» պաշտպան Ալեսանդրո Բաստոնին:

Այս գոլից 5 րոպե անց էլ «Ինտերի» կիսապաշտպան Նիկոլո Բաարելան հեռահար հարվածով գրավեց ալբանացիների դարպասը՝ 2-1:

Երկրորդ խաղակեսում հավաքականներն ավելի պասիվ գործեցին: Ալբանացիները խաղի վերջնամասում լավ հնարավորություն ունեցան հաշիվը հավասարեցնելու, սակայն Դոնարուման Իտալիային փրկեց վերահաս գոլից:

Հիշեցնենք, որ ժամեր առաջ այս խմբի առաջին խաղում Եվրոպայի եռակի չեմպիոն Իսպանիան 3-0 հաշվով հաղթել էր ԱԱ-2022-ի բրոնզե մեդալակիր Խորվաթիայի հավաքականին:

Երկրորդ տուրում Իտալիան կհանդիպի Իսպանիային (հունիսի 20), Ալբանիան՝ Խորվաթիային (հունիսի 19):

Եվրո-2024, խմբային փուլ, առաջին տուր

B խումբ

Իտալիա - Ալբանիա՝ 2-1 (տեսանյութ)

Ալեսանդրո Բաստոնի, 11, Նիկոլո Բարելա, 16 - Նեդիմ Բայրամի, 1