«Ալաշկերտի» պաշտպան Գագիկ Դաղբաշյանը Չեմպիոնների լիգայի որակավորման 2-րդ փուլի՝ ԲԱՏԷ-ի հետ պատասխան հանդիպումից հետո (1-3) պատասխանել է լրագրողների հարցերին.
-Լավ սկսեցինք հանդիպումը, սակայն պաշտպանությունում սխալներ թույլ տվեցինք, շատ հեշտությամբ մրցակցին թույլ տվեցինք գոլեր խփել, ինչի պատճառով խաղի ամբողջ ընթացքը շրջվեց:
Աբրահամ Խաշմանյանի հանձնարարությո՞ւնն էր հենց խաղասկզբից գրոհների անցնելը:
-Այո: Մենք կատարում ենք մարզչի ցուցումները: Նա նախօրոք ընտրում է տակտիկա, որի վրա էլ հետագայում աշխատում ենք մարզումների ժամանակ: Որոշել էինք, որ մրցակցին պետք է հենց նրա կիսադաշտում դիմավորենք:
Իսկ պարտությունը ֆուտբոլիստների անհատական սխալների պատճառո՞վ էր, թե՞ ընդհանուր թիմային խաղը չստացվեց:
-Մենք թիմով հաղթում ենք, թիմով՝ պարտվում: Ֆուտբոլիստների անհատական սխալները չէին պարտության պատճառը: Թիմային խաղում խնդիրներ եղան:
Ըստ Ձեզ՝ ԲԱՏԷ-ն այն մրցակի՞ցն էր, որի արգելքը հաղթահարելն անիրատեսական էր «Ալաշկերտի» համար:
-Ոչ: ԲԱՏԷ-ի արգելքն անցնելն իրատեսական էր, ուղղակի չկարողացանք դա անել:
Իսկ կոնկրետ այսօրվա մրցավեճում ԲԱՏԷ-ն խաղամակարդակով գերազանցո՞ւմ էր «Ալաշկերտին»:
-Չէի ասի: Պարզապես նրանք իրացրին իրենց գոլային պահերը, իսկ մենք՝ ոչ:
Նախո՞րդ մրցավեճում էր այս մրցակցի հետ ավելի բարդ, թե՞ այսօր:
-Նրանց մարզադաշտում ճնշումն ավելի մեծ էր: Այնտեղ բարդություններն ավելի շատ էին:
Առաջին խաղակեսում մեծ աշխատանք կատարելուց հետո «Ալաշկերտի» մոտ մյուս 45 րոպեներին հոգնածություն էր նկատվում: Ֆիզիկականի հետ կապված խնդիրնե՞ր կային:
-Ամեն դեպքում, փորձեցինք, ամբողջ ուժերը թողեցինք խաղադաշտում: Շատ էինք ուզում հաղթել, բայց հաջողությունը մրցակցի կողմն էր:
