Հայաստանի կրթության, գիտության, մշակույթի և սպորտի փոխնախարար Կարեն Գիլոյանը մեկնաբանել է ռուսաստանցի առաջատար գեղասահորդուհի Ադելիա Պետրոսյանի՝ մարզական քաղաքացիության հնարավոր փոփոխությունը:

«Մեր գեղասահքի ֆեդերացիան զբաղվում է Ադելիա Պետրոսյանի՝ մարզական քաղաքացիության հնարավոր փոփոխության հարցով։ Ես չեմ լսել, որ նա հրաժարվել է փոխել քաղաքացիությունը»,- Metaratings.ru-ի հետ զրույցում հայտնել է Գիլոյանը։

Օրեր առաջ նույն աղբյուրը հայտնել էր, թե 17-ամյա մարզուհին մերժել է Հայաստանի գեղասահքի ֆեդերացիայի առաջարկը՝ հրաժարվելով փոխել մարզական քաղաքացիությունը:

Հայաստանի գեղասահքի ֆեդերացիայից էլ ТАСС լրատվական գործակալությանը հայտնել էին, որ կապ չեն հաստատել Պետրոսյանի հետ:

Ավելի վաղ Ռուսաստանի գեղասահքի ֆեդերացիան Պետրոսյանին 2024/2025 մրցաշրջանի համար ընդգրկել էր կանանց մենասահքի թիմում: 

Հիշեցնենք, որ հայ մարզուհին մենասահքի Ռուսաստանի գործող չեմպիոնն է: Ռուսաստանցի գեղասահորդները 2022 թվականից զրկված են միջազգային մրցաշարերի մասնակցելու հնարավորությունից: