Անդրանիկ Կարապետյանը և Գոռ Մինասյանը ոսկե և արծաթե մեդալներ են նվաճել ԱՄՆ-ում յուրօրինակ ձևաչափով անցկացված «Բարեկամության գավաթ» ծանրամարտի առաջին միջազգային մրցաշարում։

Լաս Վեգասում անցկացված ստուգատեսում մրցել են տարբեր երկրների մարզիկներից կազմված 8 միջազգային զույգեր, որոնք ձևավորել են 1-ական մարզիկ-մարզուհի՝ չորս աշխարհամասերի 7 երկրից։ Նրանց թվում էին Օլիմպիական խաղերի 4 մասնակից, աշխարհի առաջնությունների 4 մրցանակակիր, Եվրոպայի, Աֆրիկայի, Օվկիանիայի և Համաամերիկյան առաջնությունների մեդալակիրներ։

Հայաստանը ներկայացնում էր 5 ծանրորդ, որոնց մրցավայր է ուղեկցել տղամարդկանց ազգային հավաքականի գլխավոր մարզիչ Փաշիկ Ալավերդյանը։

Վերջնական արդյունքը որոշվել է տվյալ զույգի ներկայացուցիչների՝ Սինկլերի սանդղակով հաշվարկված ցուցանիշների հանրագումարով։

Մրցաշարի հաղթող են դարձել Օլիմպիական խաղերի և աշխարհի առաջնությունների մեդալակիր, եգիպտուհի Սառա Ահմեդը և աշխարհի 2015 թվականի առաջնության բրոնզե մրցանակակիր, 2016-ի Եվրոպայի չեմպիոն Անդրանիկ Կարապետյանը, որոնք առաջին տեղն են գրավել Սինկլերի գործակցով հաշվարկված 700,913 կգ ընդհանուր արդյունքով։

Բոլոր՝ 8 զույգերի արդյունքները (ցուցանիշները հաշվարկված են Սինկլերի գործակցով)

1. Սառա Ահմեդ (Եգիպտոս, 297,088 կգ)/Անդրանիկ Կարապետյան (Հայաստան, 403,825 կգ)՝ 700,913 կգ
2. Մադլեն Ստանիշևսկի (ԱՄՆ, 262,387)/Գոռ Մինասյան (Հայաստան, 422,579)՝ 684,966
3. Մեդիսոն Պանել (ԱՄՆ, 281,701)/Ջոշուա Ուիկիլիֆի (Տոնգա, 378,956)՝ 660,657
4. Կուինինի Մանումուա (Տոնգա, 244,547)/Սամվել Գասպարյան (Հայաստան, 406,149)՝ 650,696
5. Լորեյն Լիգարե (Քենիա, 180,020)/Վարազդատ Լալայան (Հայաստան, 423,999)՝ 604,019
6. Լաուրա Ալեքսանդր (ԱՄՆ, 271,935)/Խակիմ Մուսոկե Սսեմպերեզա (Ուգանդա, 315,335)՝ 587,21
7. Սամար Հուսեյն (Եգիպտոս, 267,102)/Կգոտլա Ալֆիուս Կգասվանե (Բոտսվանա, 262,327)՝ 529,429
8. Ալի Թալման (ԱՄՆ, 0,000)/Դավիթ Հովհաննիսյան (Հայաստան, 399,008)՝ 399,008

Մրցաշարը նվիրված էր ԱՄՆ-ի այս տարվա առաջնությանը։ Այն նախատեսվում է դարձնել ավանդական։ 2023 թվականին ստուգատեսը, հավանաբար, կանցկացվի Առնոլդի մարզական փառատոնի հետ միաժամանակ։

Ամերիկացի մարզիկները համոզված են, որ աշխարհի լավագույն ծանրորդների հետ համատեղ մարզումները կնպաստեն միջազգային ասպարեզում իրենց ավելի հաջող ելույթներին։