Հայաստանի գավաթի խաղարկության կիսաեզրափակիչի պատասխան խաղում «Արարատ-Արմենիան» 11-մետրանոցներով հաղթեց «Փյունիկին» և երկրորդ տարին անընդմեջ դուրս եկավ եզրափակիչ։

Պատասխան խաղում «Փյունիկն» Անտոն Բռատկովի ու Դավիթ Դավիդյանի գոլերի շնորհիվ 2-0 հաշվով հաղթեց հիմնական ժամանակում: Խաղը տեղափոխվեց լրացուցիչ ժամանակ, որտեղ գոլեր չեղան: Դիմակայության առաջին մրցավեճում էլ «Արարատ-Արմենիան» էր առավելության հասել նույն հաշվով։

Հետխաղյա հարվածաշարի ժամանակ վճռորոշ դարձան «Փյունիկի» պաշտպաններ Տարոն Ոսկանյանի ու Սերգեյ Վակուլենկոյի վրիպումները։ Վարդան Մինասյանի գլխավորած թիմի ֆուտբոլիստները բոլոր չորս դեպքում գրավեցին մրցակցի դարպասը։

Հայաստանի գործող գավաթակիրը տիտղոսը կփորձի պաշտպանել «Վան» - «Նոա» դիմակայության հաղթողի դեմ։ Կողմերի առաջին խաղում «Նոան» հաղթել է 1-0 հաշվով, իսկ պատասխան խաղը կկայանա ապրիլի 30-ին, մեկնարկը` 15:00-ին («Ֆասթ Սպորտ»)։

Հայաստանի գավաթ, կիսաեզրափակիչ, պատասխան հանդիպում

«Արարատ-Արմենիա» - «Փյունիկ»` 0-2 (լրացուցիչ ժամանակ՝ 0-0) (11-մետրանոցներով` 4-2) (առաջին խաղը` 2-0)

Անտոն Բռատկով, 39, Դավիթ Դավիդյան, 52