«Լիվերպուլի» և Անգլիայի հավաքականի կիսապաշտպան Ջորդան Հենդերսոնը պատմել է, թե մերսիսայդյան թիմի գերմանացի գլխավոր մարզիչ Յուրգեն Կլոպն ինչպես է արձագանքել այն փաստին, որ ԵՎՐՈ 2020-ի 1/8 եզրափակիչում անգլիացիների մրցակիցը լինելու է Գերմանիայի ընտրանին:
Յոահիմ Լյովի գլխավորած թիմը խմբային փուլի վերջին՝ 3-րդ տուրում խուսափել է պարտությունից Հունգարիայի հավաքականի դեմ խաղում (2-2) և իր խմբում զբաղեցրել 2-րդ հորիզոնականը՝ գերազանցելով պորտուգալացիներին ու զիջելով միայն ֆրանսիացիներին: Այդպիսով, Գերմանիայի ընտրանին փլեյ-օֆֆում կհանդիպի Անգլիայի հավաքականի հետ: Հենդերսոնի խոսքով՝ գերմանացի մասնագետն անտարբեր չի անցել այդ իրադարձության կողքով:
«Հենց հնչեց եզրափակիչ սուլիչը, նա ինձ ժպտացող «էմոջի» ուղարկեց»,- Հենդերսոնի խոսքերը մեջբերում է Sky Sports-ը:
Անգլիա – Գերմանիա հանդիպումը կկայանա հունիսի 29-ին Լոնդոնի «Ուեմբլի» ստադիոնում:
