Փարիզի ՊՍԺ-ի և ֆուտբոլի Ֆրանսիայի հավաքականի հարձակվող Կիլիան Մբապեն 6-րդ մարզիկն է, որն Instagram սոցիալական ցանցում հատել է 100 միլիոն հետևորդի շեմը, հայտնում է PSG Community-ը:

Մարզիկների մեջ ամենաշատ հետևորդներն այս հարթակում ունի Սաուդյան Արաբիայի «Ալ Նասր» ակումբի և Պորտուգալիայի հավաքականի հարձակվող Կրիշտիանու Ռոնալդուն (556 միլիոն)։ 38-ամյա ֆուտբոլիստին հաջորդում են ՊՍԺ-ի և աշխարհի նորընծա չեմպիոն Արգենտինայի հավաքականի հարձակվող Լիոնել Մեսին (437 միլիոն), հնդիկ կրիկետիստ Վիրատ Կոհլին (239 միլիոն), ՊՍԺ-ի բրազիլացի հարձակվող Նեյմարը (206 միլիոն) և «Լոս Անջելես Լեյքերսի» առաջատար բասկետբոլիստ Լեբրոն Ջեյմսը (147 միլիոն):

Հիշեցնենք, որ Լիոնել Մեսիի՝ աշխարհի գավաթով լուսանկարը Instagram-ի պատմության մեջ ամենաշատ հավանում հավաքած հրապարակումն է։ Այդ լուսանկարն ունի 75 միլիոնից ավելի հավանում։ Կրիշտիանու Ռոնալդուն իր հերթին Instagram-ում ամենաշատ հետևորդ ունեցող մարդն է։