Իռլանդացիների հետ խաղում Կամո Հովհաննիսյանը Հայաստանի ազգային հավաքականի մարզաշապիկով 90-րդ անգամ խաղադաշտ դուրս եկավ՝ դառնալով այդ սահմանագիծը հատած 5-րդ ֆուտբոլիստը: Խաղերից 27-ը նա անցկացրել է աշխարհի, 19-ը՝ Եվրոպայի առաջնությունների ընտրական մրցաշարերում, 16 անգամ մասնակցել է Ազգերի լիգայի հանդիպումներին, 28 անգամ էլ խաղադաշտ է դուրս եկել հավաքականի ընկերական հանդիպումներում:

Կամոն հավաքականի ներկայիս կազմի ֆուտբոլիստներից ամենափորձառուն է: 33-ամյա ֆուտբոլիստը լավ հնարավորություն ունի գերազանցելու վերջերս հավաքականին հրաժեշտ տված Վարազդատ Հարոյանի տարիքային ռեկորդը: Վերջինս այդ տարիքում հավաքականում բոլորից շատ՝ 92 խաղ է անցկացրել:

Կամո Հովհաննիսյանը կարող է մեկ այլ, ավելի նշանակալի նվաճման հասնել, եթե հաջորդ մրցաշրջանում էլ շարունակի ելույթները հավաքականում: Սարգիս Հովսեփյանից հետո փորձառու պաշտպանը կարող է դառնալ Հայաստանի ազգային հավաքականում 100 խաղի սահմանագիծը հատած 2-րդ ֆուտբոլիստը:

Հովհաննիսյանի նորամուտը հավաքականում տեղի է ունեցել է 2012թ. փետրվարի 28-ին սերբերի հետ Կիպրոսի Լիմասոլ քաղաքում կայացած ընկերական խաղում (0-2): Հավաքականի գլխավոր մարզիչ Վարդան Մինասյանը 19-ամյա պատանի ֆուտբոլիստին ընդմիջումից անմիջապես հետո խաղադաշտ դուրս բերեց Մասիս Ոսկանյանի փոխարեն:

Սերբերի հետ հանդիպմանը ՀՀ հավաքականը ներկայացել էր երիտասարդական կազմով: Բացի Հովհաննիսյանից, այդ օրը հավաքականում իրենց առաջին խաղն անցկացրին նաև Գրիգոր Մելիքսեթյանը, Գագիկ Դաղբաշյանը, Ղուկաս Պողոսյանը, Մասիս Ոսկանյանը, Վալտեր Պողոսյանն ու Անդրանիկ Ոսկանյանը:

Կանադայի հետ հաջորդ օրն անցկացրած խաղում հավաքականն արդեն իր հիմնական կազմով էր, որին հաջողվեց հաղթել 3-1 հաշվով: Կամո Հովհաննիսյանն այդ խաղում մի քանի րոպե անցկացրեց խաղադաշտում՝ ավելացված ժամանակում փոխարինելով Լևոն Հայրապետյանին:

Պաշտոնական առաջին խաղը հավաքականում Հովհաննիսյանն անցկացրել է 2013թ. մարտի 26-ին չեխերի հետ Երևանում կայացած աշխարհի առաջնության ընտրական հանդիպման ժամանակ, որում մեր ազգային թիմը 0-3 խոշոր հաշվով զիջել էր մրցակցին: Հավաքականում արդեն որոշակի փորձ կուտակած և ընկերական 7 հանդիպման մասնակցած Կամոն մեկնարկային կազմում էր ու խաղադաշտում մնաց մինչև խաղավերջ:

2019թ. նոյեմբերի 18-ին Պալերմոյում Իտալիայի հավաքականի հետ կայացած ԵՎՐՈ-2020-ի ընտրական մրցաշարի հանդիպումը (1-9) Կամո Հովհաննիսյանի հոբելյանական՝ 50-րդ խաղն էր Հայաստանի հավաքականի կազմում: Նա համալրեց Արթուր Պետրոսյանի անվան խորհրդանշական «50-ի ակումբի» շարքերը: Հետաքրքիր է, որ այդ խաղում նման հոբելյան էր նշել նաև Կամոյի խաղընկեր Վարազդատ Հարոյանը:

Հովհաննիսյանին բախտ է վիճակվել 3 անգամ կրելու հավաքականի ավագի թևկապը: Առաջին անգամ դա տեղի է ունեցել 2021թ. հունիսի 1-ին խորվաթների հետ հյուրընկալվելիս կայացած ընկերական խաղում: 4 օր անց շվեդների հետ կայացած ընկերական խաղում Կամոն կրկին հավաքականի ավագն էր: Վերջին անգամ նա ավագի թևկապը կրել է 2022թ. հունիսի 11-ին Լոձում ուկրաինացիների հետ անցկացրած Ազգերի լիգայի խաղում:

Հավաքականում Հովհաննիսյանը 3 գոլի հեղինակ է դարձել: Նա գոլերի հաշիվը բացել է 2020թ. հոկտեմբերի 14-ին էստոնացիների հետ Տալլինում կայացած Ազգերի լիգայի խաղում (1-1): Հանդիպման 8-րդ րոպեին Կամոն գրավեց Կառլ Հեյնի պաշտպանած դարպասը՝ բացելով հաշիվը:

Հաջորդ տարվա հոկտեմբերի 8-ին իսլանդացիների հետ Ռեյկյավիկում կայացած աշխարհի առաջնության ընտրական մրցախաղում էլ Հովհաննիսյանը 35-րդ րոպեին բացել էր հաշիվը, սակայն մրցակցին 2-րդ խաղակեսում հաջողվել էր պատասխան գոլը խփել:

2022թ. նոյեմբերի 16-ին Կոսովոյի հետ մրցակցի դաշտում կայացած ընկերական խաղում Կամոն 82-րդ րոպեին հավաքականին հաշվի մեջ առաջ էր մղել, սակայն ավելացված ժամանակում տանտերերը փրկվել էին պարտությունից՝ 2-2:

FastNews-ը ներկայացնում է Հայաստանի ազգային հավաքականի կազմում անցկացրած խաղերի քանակով ամենափորձառու ֆուտբոլիստների տասնյակը:

Ֆուտբոլիստներ	Խաղ
1. Սարգիս Հովսեփյան	132
2. Հենրիխ Մխիթարյան	95
3. Ռոման Բերեզովսկի	94
4. Վարազդատ Հարոյան	92
5. Կամո Հովհաննիսյան	90
6. Գևորգ Ղազարյան	75
7. Ռոբերտ Արզումանյան	74
8. Արթուր Պետրոսյան	69
9. Մարկոս Պիզելի	67
10. Հարություն Վարդանյան	63