Մադրիդի «Ռեալի» գերմանացի կիսապաշտպան Տոնի Կրոսն անդրադարձել է Դորտմունդի «Բորուսիային», որի դեմ «Արքայական ակումբը» խաղալու է Չեմպիոնների լիգայի եզրափակիչում։
«Տեսեք, թե խմբային փուլում «Բորուսիան» ինչ մրցակիցներ է ունեցել՝ ՊՍԺ, «Միլան», «Նյուքասլ», իսկ փլեյ-օֆֆում՝ ՊՍՎ, «Աթլետիկո» ու նորից ՊՍԺ։ Երբ դուք գերազանցում եք այդպիսի ակումբների, արդեն չի կարելի ասել, որ որևէ խաղում բախտը ժպտացել է։ Նրանք արժանի են լինել եզրափակիչում։ Եթե դուք հասել եք Չեմպիոնների լիգայի եզրափակիչ, ուրեմն կարող եք հաղթել»,- Կրոսի խոսքը մեջբերում է Madrid Zone-ը։
Հիշեցնենք, որ իսպանական և գերմանական ակումբների մասնակցությամբ գլխավոր եվրագավաթի եզրափակիչը տեղի կունենա հունիսի 1-ին Լոնդոնի «Ուեմբլի» ստադիոնում, կմեկնարկի Երևանի ժամանակով 23:00-ին և կցուցադրվի Fast Sports հեռուստաալիքի ուղիղ եթերում:
