ՊՍԺ-ի վինգեր Խվիչա Կվարացխելիան խոսել է «Արսենալի» դեմ կայանալիք Չեմպիոնների լիգայի կիսաեզրափակիչի առաջին հանդիպման մասին.
«Չեմպիոնների լիգան, ըստ իս, ֆուտբոլային գլխավոր մրցաշարն է։ Դրան մասնակցելը յուրաքանչյուր ֆուտբոլիստի երազանքն է։ Բոլորը ցանկանում են նվաճել գավաթը, բայց դա անհավանական բարդ է։
Սա չեմպիոնների մրցաշարն է, որտեղ բոլոր թիմերը բավարար վարպետություն ունեն հաղթելու համար։ Մենք պետք է կենտրոնանանք մեր խաղի վրա։ Մենք մանրակրկիտ ուսումնասիրել ենք մրցակցի խաղը։
Շատ հաճելի է, որ անգլիական ֆուտբոլն այժմ ավելի լավ ենք հասկանում, հատկապես «Լիվերպուլին» ու «Ասթոն Վիլային» հաղթելուց հետո»,- վրացի ֆուտբոլիստի խոսքը մեջբերում է փարիզյան գրանդի պաշտոնական կայքը։
«Պարի Սեն-Ժերմենը» Չեմպիոնների լիգայի 1/8 եզրափակիչում երկխաղյա դիմակայությունում պայքարից դուրս էր թողել «Լիվերպուլին», իսկ քառորդ եզրափակիչում` «Ասթոն Վիլային»։
«Արսենալ» - ՊՍԺ հանդիպումը կկայանա ապրիլի 29-ին, Երևանի ժամանակով 22:45-ից կլինի «Ֆասթ Սպորտ»-ի ուղիղ եթերում:
